'ਧੋਨੀ ਅਜੇ ਖਤਮ ਨਹੀਂ ਹੋਇਆ, ਫਿਨੀਸ਼ਰ ਅਜੇ ਵੀ ਜ਼ਿੰਦਾ ਹੈ', ਬਾਕੀ ਟੀਮਾਂ ਨੂੰ ਮੁਹੰਮਦ ਕੈਫ ਦੀ ਚੇਤਾਵਨੀ

ਆਈਪੀਐਲ 2022 ਦੇ ਪਹਿਲੇ ਦੋ ਮੈਚ ਹਾਰਨ ਤੋਂ ਬਾਅਦ ਚੇਨਈ ਦੀ ਟੀਮ ਬਿਨਾਂ ਸ਼ੱਕ ਦਬਾਅ ਮਹਿਸੂਸ ਕਰ ਰਹੀ ਹੈ ਪਰ ਧੋਨੀ ਦੀ ਫਾਰਮ ਪ੍ਰਸ਼ੰਸਕਾਂ ਲਈ ਇੱਕ ਚੰਗੀ ਖ਼ਬਰ ਲੈ ਕੇ ਆਈ ਹੈ ਅਤੇ ਇਹੀ ਕਾਰਨ ਹੈ ਕਿ ਸਾਬਕਾ ਭਾਰਤੀ ਕ੍ਰਿਕਟਰ ਅਤੇ ਕ੍ਰਿਕਟ ਮਾਹਰ ਮੁਹੰਮਦ ਕੈਫ ਦਾ ਮੰਨਣਾ ਹੈ ਕਿ ਅਜੇ ਵੀ ਐਮਐਸ ਧੋਨੀ ਦੀ ਕਹਾਣੀ ਖਤਮ ਨਹੀਂ ਹੋਈ ਹੈ ਅਤੇ ਉਹ ਅਜੇ ਵੀ ਸਭ ਤੋਂ ਵਧੀਆ ਫਿਨਿਸ਼ਰਾਂ ਵਿੱਚੋਂ ਇੱਕ ਹੈ।

ਐੱਮ.ਐੱਸ.ਧੋਨੀ ਨੇ ਮੌਜੂਦਾ ਸੀਜ਼ਨ 'ਚ ਖੇਡੇ ਗਏ ਦੋ ਮੈਚਾਂ 'ਚ ਹੁਣ ਤੱਕ 150 ਦੀ ਸ਼ਾਨਦਾਰ ਸਟ੍ਰਾਈਕ ਰੇਟ ਨਾਲ 66 ਦੌੜਾਂ ਬਣਾਈਆਂ ਹਨ ਅਤੇ ਅਜੇ ਤੱਕ ਇਸ ਸੀਜ਼ਨ 'ਚ ਆਊਟ ਹੋਣਾ ਬਾਕੀ ਹੈ। ਧੋਨੀ ਦੀ ਬੱਲੇਬਾਜ਼ੀ ਨੂੰ ਦੇਖਣ ਤੋਂ ਬਾਅਦ ਮੁਹੰਮਦ ਕੈਫ ਨੂੰ ਲੱਗਦਾ ਹੈ ਕਿ ਸ਼ਾਇਦ ਇਹ ਉਹ ਸੀਜ਼ਨ ਹੋ ਸਕਦਾ ਹੈ ਜਿੱਥੇ ਧੋਨੀ ਆਪਣੀ ਪੁਰਾਣੀ ਫਾਰਮ 'ਚ ਵਾਪਸੀ ਕਰ ਸਕਦੇ ਹਨ।

ਸਪੋਰਟਸਕੀਡਾ ਨਾਲ ਗੱਲਬਾਤ ਦੌਰਾਨ ਕੈਫ ਨੇ ਕਿਹਾ, ''ਧੋਨੀ ਅਜੇ ਫਿਨਿਸ਼ ਨਹੀਂ ਹੋਏ ਹਨ, ਉਹ ਅਜੇ ਫਿਨਿਸ਼ਰ ਹਨ। ਲੋਕਾਂ ਨੇ ਇੱਥੋਂ ਤੱਕ ਕਿਹਾ ਕਿ ਉਸ ਦਾ ਸਮਾਂ ਖਤਮ ਹੋ ਗਿਆ ਹੈ ਅਤੇ ਇਹ ਉਸ ਦਾ ਆਖਰੀ ਆਈ.ਪੀ.ਐੱਲ ਹੋ ਸਕਦਾ ਹੈ, ਪਰ ਦੇਖੋ ਜਿਸ ਤਰ੍ਹਾਂ ਉਸ ਨੇ ਦੋਵਾਂ 'ਮੈਚਾਂ ਵਿਚ ਨਾਟ ਆਊਟ ਬੱਲੇਬਾਜ਼ੀ ਕੀਤੀ। ਹੋ ਸਕਦਾ ਹੈ ਕਿ ਇਸ ਸਾਲ ਅਸੀਂ ਧੋਨੀ ਨੂੰ ਦੇਖ ਸਕਦੇ ਹਾਂ ਜੋ ਪਹਿਲੀ ਗੇਂਦ ਨਾਲ ਚੌਕੇ ਮਾਰਨ ਦੀ ਸ਼ੁਰੂਆਤ ਕਰਦਾ ਸੀ।"

ਅੱਗੇ ਬੋਲਦੇ ਹੋਏ, ਉਸਨੇ ਕਿਹਾ, "ਉਸਨੇ ਬੇਸ਼ੱਕ ਕਾਗਜ਼ਾਂ 'ਤੇ ਕਪਤਾਨੀ ਛੱਡ ਦਿੱਤੀ ਹੈ ਅਤੇ ਹੋ ਸਕਦਾ ਹੈ ਕਿ ਉਹ ਜ਼ਿਆਦਾ ਦਬਾਅ ਵਿੱਚ ਨਾ ਹੋਵੇ। ਇਸ ਲਈ ਅਸੀਂ ਸਟੇਡੀਅਮ ਦੇ ਬਾਹਰ ਗੇਂਦ ਨੂੰ ਹਿੱਟ ਕਰਨ ਵਾਲੇ ਧੋਨੀ ਨੂੰ ਖੁੱਲ੍ਹਾ-ਡੁੱਲ੍ਹਾ ਦੇਖ ਸਕਦੇ ਹਾਂ। ਮਹਾਰਾਸ਼ਟਰ ਦੀਆਂ ਵਿਕਟਾਂ ਚੰਗੀਆਂ ਹਨ ਅਤੇ ਉਸਨੂੰ ਪੇਸ ਵੀ ਮਿਲੇਗੀ ਅਤੇ ਜਿਸ ਤਰ੍ਹਾਂ ਉਸ ਨੇ ਪਹਿਲੀ ਗੇਂਦ 'ਤੇ ਛੱਕਾ ਲਗਾਇਆ, ਉਸ ਤੋਂ ਪਤਾ ਲੱਗਦਾ ਹੈ ਕਿ ਉਹ ਚੰਗੀ ਫਾਰਮ 'ਚ ਹੈ।"