'ਟੈਸਟ ਕ੍ਰਿਕਟ ਦੇ ਨਾਲ ਇਸ ਤਰ੍ਹਾਂ ਦਾ ਮਜ਼ਾਕ ਨਹੀਂ ਹੋਣਾ ਚਾਹੀਦਾ ਹੈ, ਪਾਕਿਸਤਾਨ ਦੀ ਜਿੱਤ ਦੇ ਬਾਅਦ ਵੀ ਨਾਖੁਸ਼ ਹੋਏ ਰਮੀਜ਼ ਰਾਜ਼ਾ

ਪਾਕਿਸਤਾਨ ਦੀ ਕ੍ਰਿਕਟ ਟੀਮ ਨੇ ਜ਼ਿੰਬਾਬਵੇ ਨੂੰ ਟੈਸਟ ਸੀਰੀਜ਼ ਵਿਚ 2-0 ਨਾਲ ਹਰਾ ਕੇ ਕਲੀਨ ਸਵੀਪ ਕਰ ਲਿਆ ਹੈ, ਪਰ ਸਾਬਕਾ ਪਾਕਿਸਤਾਨੀ ਕ੍ਰਿਕਟਰ ਰਮੀਜ਼ ਰਾਜਾ ਇਸ ਜਿੱਤ ਦੇ ਬਾਵਜੂਦ ਨਾਖੁਸ਼ ਨਜ਼ਰ ਆ ਰਹੇ ਹਨ। ਉਸਨੇ ਇਸ ਟੈਸਟ ਲੜੀ ਬਾਰੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ।

ਬਾਬਰ ਆਜ਼ਮ ਦੀ ਅਗਵਾਈ ਵਾਲੀ ਪਾਕਿਸਤਾਨ ਦੀ ਟੀਮ ਨੇ ਸੋਮਵਾਰ ਨੂੰ ਦੂਜੇ ਟੈਸਟ ਮੈਚ ਵਿੱਚ ਮੇਜ਼ਬਾਨ ਟੀਮ ਨੂੰ ਪਾਰੀ ਅਤੇ 147 ਦੌੜਾਂ ਨਾਲ ਹਰਾਇਆ। ਇਸ ਤੋਂ ਪਹਿਲਾਂ ਬ੍ਰੈਂਡਨ ਟੇਲਰ ਦੀ ਟੀਮ ਨੂੰ ਵੀ ਪਹਿਲੇ ਟੈਸਟ ਵਿੱਚ ਪਾਰੀ ਅਤੇ 116 ਦੌੜਾਂ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।

ਆਪਣੇ ਯੂਟਿਯੂਬ ਚੈਨਲ 'ਤੇ ਬੋਲਦਿਆਂ ਰਮੀਜ਼ ਰਾਜਾ ਨੇ ਕਿਹਾ, "ਅਜਿਹੀ ਕੋਈ ਬੇਮੇਲ ਲੜੀ ਨਹੀਂ ਹੋਣੀ ਚਾਹੀਦੀ। ਟੈਸਟ ਕ੍ਰਿਕਟ ਪਹਿਲਾਂ ਹੀ ਦਬਾਅ ਹੇਠ ਹੈ ਅਤੇ ਬਹੁਤ ਘੱਟ ਲੋਕ ਇਸ ਨੂੰ ਵੇਖਦੇ ਹਨ। ਜੇ ਤੁਸੀਂ ਉਨ੍ਹਾਂ ਨੂੰ ਅਜਿਹੇ ਇਕਪਾਸੜ ਮੈਚ ਦਿਖਾਉਂਦੇ ਹੋ, ਤਾਂ ਉਹ ਫੁੱਟਬਾਲ ਜਾਂ ਹੋਰ ਖੇਡਾਂ ਨੂੰ ਵੇਖਣਾ ਸ਼ੁਰੂ ਕਰ ਦੇਣਗੇ। ਤਿੰਨ ਦਿਨਾਂ ਟੈਸਟ ਮੈਚ ਇਕ ਮਜ਼ਾਕ ਹੈ।”

ਇਸ ਦੇ ਨਾਲ ਹੀ ਜੇਕਰ ਇਸ ਲੜੀ ਦੀ ਗੱਲ ਕਰੀਏ ਤਾਂ ਪਾਕਿਸਤਾਨ ਲਈ ਆਬਿਦ ਅਲੀ, ਅਜ਼ਹਰ ਅਲੀ, ਹਸਨ ਅਲੀ ਅਤੇ ਸ਼ਾਹੀਨ ਅਫਰੀਦੀ ਨੇ ਸ਼ਾਨਦਾਰ ਪ੍ਰਦਰਸ਼ਨ ਦਿੱਤਾ। ਆਬਿਦ ਅਤੇ ਅਜ਼ਹਰ ਨੇ 2 ਟੈਸਟ ਮੈਚਾਂ ਵਿਚ ਕ੍ਰਮਵਾਰ 275 ਅਤੇ 162 ਦੌੜਾਂ ਬਣਾਈਆਂ ਜਦਕਿ ਹਸਨ ਅਤੇ ਸ਼ਾਹੀਨ ਨੇ 14 ਅਤੇ 10 ਵਿਕਟਾਂ ਲਈਆਂ।