ਆਸਟਰੇਲੀਆ ਦੇ ਸਲਾਮੀ ਬੱਲੇਬਾਜ਼ ਜੋ ਬਰਨਜ਼ ਨੇ ਕਿਹਾ ਹੈ ਕਿ ਵਿਰਾਟ ਕੋਹਲੀ ਅਤੇ ਮੁਹੰਮਦ ਸ਼ਮੀ ਦੀ ਗੈਰਹਾਜ਼ਰੀ ਟੈਸਟ ਸੀਰੀਜ਼ ਵਿਚ ਭਾਰਤ ਲਈ ਇਕ ਵੱਡਾ ਘਾਟਾ ਹੈ। ਐਡੀਲੇਡ ਵਿੱਚ ਖੇਡੇ ਗਏ ਪਹਿਲੇ ਟੈਸਟ ਮੈਚ ਵਿੱਚ ਸ਼ਮੀ ਦੇ ਪੈਟ ਕਮਿੰਸ ਦੀ ਗੇਂਦ ਤੇ ਸੱਟ ਲੱਗ ਗਈ ਸੀ, ਜਿਸ ਕਾਰਨ ਉਹ ਲੜੀ ਦੇ ਬਾਕੀ ਤਿੰਨ ਮੈਚਾਂ ਤੋਂ ਬਾਹਰ ਹੋ ਗਏ ਹਨ। ਇਸ ਦੇ ਨਾਲ ਹੀ ਕੋਹਲੀ ਆਪਣੇ ਪਹਿਲੇ ਬੱਚੇ ਦੇ ਜਨਮ ਲਈ ਘਰ ਪਰਤ ਰਹੇ ਹਨ। ਉਹ ਵੀ ਬਾਕੀ ਤਿੰਨ ਮੈਚਾਂ ਵਿੱਚ ਨਹੀਂ ਹੋਣਗੇ।
ਬਰਨਜ਼ ਨੇ ਸੋਮਵਾਰ ਨੂੰ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ, “ਮੈਨੂੰ ਲਗਦਾ ਹੈ ਕਿ ਸ਼ਮੀ ਅਤੇ ਵਿਰਾਟ ਦਾ ਨਾ ਹੋਣਾ ਭਾਰਤ ਲਈ ਵੱਡਾ ਘਾਟਾ ਹੈ। ਪਰ ਫਿਰ ਵੀ ਭਾਰਤੀ ਟੀਮ ਦੇ ਕੋਲ ਡੂੰਘਾਈ ਹੈ ਅਤੇ ਉਹ ਅਜੇ ਵੀ ਬਹੁਤ ਚੁਣੌਤੀਪੂਰਨ ਹੋਣਗੇ। ਵਿਸ਼ਵ ਪੱਧਰੀ ਖਿਡਾਰੀ ਦੀ ਥਾਂ ਲੈਣਾ ਸੌਖਾ ਨਹੀਂ ਹੁੰਦਾ। ਸਾਡਾ ਧਿਆਨ ਇਸ ਗੱਲ 'ਤੇ ਹੈ ਕਿ ਉਨ੍ਹਾਂ ਦੀ ਜਗ੍ਹਾ ਕੌਣ ਆਉੰਦਾ ਹੈ। ਸਾਨੂੰ ਅਗਲੇ ਮੈਚ ਲਈ ਚੰਗੀ ਤਿਆਰੀ ਕਰਨੀ ਪਏਗੀ। ਅਸੀਂ ਜਾਣਦੇ ਹਾਂ ਕਿ ਭਾਰਤੀ ਟੀਮ ਜ਼ੋਰਦਾਰ ਵਾਪਸੀ ਕਰ ਸਕਦੀ ਹੈ ਪਰ ਸਾਨੂੰ ਪਹਿਲੇ ਮੈਚ ਦੀ ਲੈਅ ਬਣਾਈ ਰੱਖਣੀ ਪਏਗੀ।”
ਸੀਰੀਜ਼ ਦੀ ਸ਼ੁਰੂਆਤ ਤੋਂ ਪਹਿਲਾਂ, ਬਰਨਜ਼ ਦੇ ਆਪਣੇ ਫੌਰਮ 'ਤੇ ਸਵਾਲੀਆ ਨਿਸ਼ਾਨ ਲੱਗ ਗਿਆ ਸੀ, ਪਰ ਉਹਨਾਂ ਨੇ ਪਹਿਲੇ ਟੈਸਟ ਦੀ ਦੂਜੀ ਪਾਰੀ' ਚ ਨਾਬਾਦ 51 ਦੌੜਾਂ ਦੀ ਪਾਰੀ ਖੇਡ ਕੇ ਇਹਨਾਂ ਸਵਾਲਾਂ ਨੂੰ ਖਤਮ ਕਰ ਦਿੱਤਾ।
ਆਪਣੇ ਫੌਰਮ 'ਤੇ, ਸਲਾਮੀ ਬੱਲੇਬਾਜ਼ ਨੇ ਕਿਹਾ, "ਕੁਝ ਦੌੜਾਂ ਬਣਾਉਣਾ ਚੰਗੀ ਗੱਲ ਹੈ। ਮੇਰੇ ਕੋਲ ਸੀਰੀਜ਼ ਦੀ ਸ਼ੁਰੂਆਤ ਤੋਂ ਪਹਿਲਾਂ ਦੌੜਾਂ ਨਹੀਂ ਸਨ। ਫੌਰਮ’ ਚ ਵਾਪਸ ਆਉਣਾ ਚੰਗਾ ਰਿਹਾ। ਆਸਟਰੇਲੀਆ ਲਈ ਇਹ ਚੰਗਾ ਦਿਨ ਸੀ। ਕੰਮ ਨੂੰ ਜਲਦੀ ਪੂਰਾ ਕਰਕੇ ਚੰਗਾ ਲੱਗਿਆ।"
ਬਰਨਜ਼ ਨੇ ਕਿਹਾ, "ਇਹ ਦੌੜਾਂ ਯਕੀਨੀ ਤੌਰ 'ਤੇ ਮਦਦ ਕਰਦੀਆਂ ਹਨ। ਅਜਿਹਾ ਮਹਿਸੂਸ ਹੋਇਆ ਕਿ ਕੋਵਿਡ 19 ਦੇ ਬਾਅਦ ਘਰ' ਚ ਵਾਪਸੀ ਕੀਤੀ। ਟੀਮ ਦਾ ਬਹੁਤ ਜ਼ਿਆਦਾ ਸਮਰਥਨ ਅਤੇ ਵਿਸ਼ਵਾਸ ਮਿਲਿਆ।"