ਰਿਸ਼ਭ ਪੰਤ ਇੱਕ ਅਜਿਹਾ ਨਾਮ ਜਿਸ ਨੇ ਟੈਸਟ ਕ੍ਰਿਕਟ ਵਿੱਚ ਅਜਿਹੀ ਛਾਪ ਛੱਡੀ ਹੈ ਕਿ ਗੇਂਦਬਾਜ਼ ਉਸ ਤੋਂ ਕੰਬ ਜਾਂਦੇ ਹਨ ਪਰ ਜਦੋਂ ਗੱਲ ਚਿੱਟੀ ਗੇਂਦ ਦੀ ਆਉਂਦੀ ਹੈ, ਪੰਤ ਟੈਸਟ ਕ੍ਰਿਕਟ ਦੀ ਸਫਲਤਾ ਨੂੰ ਦੁਹਰਾਉਣ ਵਿੱਚ ਅਸਫਲ ਰਿਹਾ ਹੈ। ਹਾਲਾਂਕਿ ਟੈਸਟ ਕ੍ਰਿਕਟ 'ਚ ਪੰਤ ਦੀ ਸਫਲਤਾ ਨੂੰ ਦੇਖ ਕੇ ਕਈ ਦਿੱਗਜ ਖਿਡਾਰੀ ਆਵਾਜ਼ ਉਠਾ ਰਹੇ ਹਨ ਕਿ ਉਸ ਨੂੰ ਸਫੇਦ ਗੇਂਦ ਦੇ ਫਾਰਮੈਟ 'ਚ ਓਪਨ ਕਰਾਇਆ ਜਾਣਾ ਚਾਹੀਦਾ ਹੈ।
ਸਾਬਕਾ ਮਹਾਨ ਕ੍ਰਿਕਟਰ ਸੁਨੀਲ ਗਾਵਸਕਰ ਦਾ ਨਾਂ ਇਸ ਲਿਸਟ 'ਚ ਸਭ ਤੋਂ ਉੱਪਰ ਹੈ, ਜੋ ਰਿਸ਼ਭ ਦੇ ਬਹੁਤ ਵੱਡੇ ਪ੍ਰਸ਼ੰਸਕ ਹਨ ਅਤੇ ਚਾਹੁੰਦੇ ਹਨ ਕਿ ਭਾਰਤੀ ਟੀਮ ਪ੍ਰਬੰਧਨ ਉਸ ਨੂੰ ਸਫੈਦ ਗੇਂਦ ਦੇ ਫਾਰਮੈਟ 'ਚ ਓਪਨਿੰਗ ਕਰਾਉਣ। ਗਾਵਸਕਰ ਦਾ ਮੰਨਣਾ ਹੈ ਕਿ ਪੰਤ ਆਸਟ੍ਰੇਲੀਆਈ ਦਿੱਗਜ ਐਡਮ ਗਿਲਕ੍ਰਿਸਟ ਵਾਂਗ ਓਪਨਿੰਗ ਕਰਨ 'ਚ ਕਾਮਯਾਬ ਹੋ ਸਕਦੇ ਹਨ।
ਸਪੋਰਟਸ ਟੂਡੇ 'ਤੇ ਬੋਲਦੇ ਹੋਏ ਗਾਵਸਕਰ ਨੇ ਕਿਹਾ, "ਬਿਲਕੁਲ ਬੁਰਾ ਵਿਕਲਪ ਨਹੀਂ ਹੈ। ਦੇਖੋ ਐਡਮ ਗਿਲਕ੍ਰਿਸਟ ਨੇ ਚਿੱਟੀ ਗੇਂਦ ਦੀ ਕ੍ਰਿਕਟ ਵਿੱਚ ਆਸਟਰੇਲੀਆ ਲਈ ਕੀ ਕੀਤਾ। ਉਹ ਟੈਸਟ ਕ੍ਰਿਕਟ ਵਿੱਚ ਨੰਬਰ 6 ਜਾਂ 7 'ਤੇ ਬੱਲੇਬਾਜ਼ੀ ਕਰਦਾ ਸੀ ਪਰ ਚਿੱਟੀ ਗੇਂਦ ਦੀ ਕ੍ਰਿਕਟ ਵਿੱਚ ਉਹ ਓਪਨਿੰਗ ਕਰਦੇ ਸਮੇਂ ਵਿਨਾਸ਼ਕਾਰੀ ਸੀ। ਹੋ ਸਕਦਾ ਹੈ ਕਿ ਰਿਸ਼ਭ ਪੰਤ ਵੀ ਉਸਦੇ ਵਰਗਾ ਖ਼ਤਰਨਾਕ ਹੋਵੇ ਅਤੇ ਉਸ ਨੂੰ ਖੇਡਣ ਲਈ ਹੋਰ ਓਵਰ ਵੀ ਮਿਲ ਜਾਣਗੇ।"
ਗਾਵਸਕਰ ਨੇ ਅੱਗੇ ਬੋਲਦੇ ਹੋਏ ਕਿਹਾ, ''ਅਸੀਂ ਉਸ ਦੇ ਬਾਰੇ 'ਚ ਫਿਨਿਸ਼ਰ ਦੇ ਤੌਰ 'ਤੇ ਗੱਲ ਕਰ ਰਹੇ ਹਾਂ, ਪਰ ਜਦੋਂ ਉਹ ਬੱਲੇਬਾਜ਼ੀ ਕਰਨ ਲਈ ਆਉਂਦਾ ਹੈ ਤਾਂ ਉਹ ਗੇਂਦ ਨੂੰ ਹਿੱਟ ਕਰਨਾ ਸ਼ੁਰੂ ਕਰ ਦਿੰਦਾ ਹੈ ਅਤੇ ਸਿੱਧਾ ਆਊਟ ਹੋ ਜਾਂਦਾ ਹੈ। ਇੱਥੇ ਉਸਨੂੰ ਆਉਂਦੇ ਹੀ ਵੱਡੇ ਸ਼ਾੱਟ ਖੇਡਣ ਦੀ ਲੋੜ ਨਹੀਂ ਹੈ। ਉਸ ਕੋਲ ਰਫ਼ਤਾਰ ਦੀ ਆਦਤ ਪਾਉਣ ਲਈ ਥੋੜ੍ਹਾ ਸਮਾਂ ਹੋਵੇਗਾ।" ਤੁਹਾਨੂੰ ਦੱਸ ਦੇਈਏ ਕਿ ਗਾਵਸਕਰ ਤੋਂ ਇਲਾਵਾ ਵਸੀਮ ਜਾਫਰ ਨੇ ਵੀ ਟਵੀਟ ਕਰਕੇ ਪੰਤ ਨੂੰ ਟੀ-20 ਵਿੱਚ ਓਪਨਿੰਗ ਕਰਨ ਦੀ ਮੰਗ ਕੀਤੀ ਹੈ।