ਮੰਗਲਵਾਰ ਨੂੰ ਆਈਪੀਐਲ ਦੇ 13 ਵੇਂ ਸੀਜ਼ਨ ਦੇ ਆਪਣੇ 10 ਵੇਂ ਮੈਚ ਵਿੱਚ ਕਿੰਗਜ਼ ਇਲੈਵਨ ਪੰਜਾਬ ਦੇ ਖਿਲਾਫ ਮਿਲੀ ਹਾਰ ਤੋਂ ਬਾਅਦ, ਦਿੱਲੀ ਕੈਪਿਟਲਸ ਦੇ ਕਪਤਾਨ ਸ਼੍ਰੇਅਸ ਅਈਅਰ ਨੇ ਕਿਹਾ ਕਿ ਉਨ੍ਹਾਂ ਦੀ ਟੀਮ ਨੇ 10 ਦੌੜਾਂ ਘੱਟ ਬਣਾਈਆਂ ਸੀ. ਉਹਨਾਂ ਨੇ ਨਾਲ ਹੀ ਕਿਹਾ ਕਿ ਟੀਮ ਅਗਲੇ ਮੈਚ ਵਿਚ ਜ਼ੋਰਦਾਰ ਵਾਪਸੀ ਕਰੇਗੀ. ਦੁਬਈ ਇੰਟਰਨੈਸ਼ਨਲ ਸਟੇਡੀਅਮ ਵਿਚ ਖੇਡੇ ਗਏ ਇਸ ਸੀਜ਼ਨ ਦੇ ਆਈਪੀਐਲ ਦੇ 38 ਵੇਂ ਮੈਚ ਵਿਚ, ਦਿੱਲੀ ਨੇ ਟੌਸ ਜਿੱਤ ਕੇ ਸ਼ਿਖਰ ਧਵਨ (ਨਾਬਾਦ 106) ਦੇ ਸੈਂਕੜੇ ਦੀ ਬਦੌਲਤ 164 ਦੌੜਾਂ ਬਣਾਈਆਂ, ਜਦਕਿ ਪੰਜਾਬ ਨੇ ਟੀਚਾ 19 ਓਵਰਾਂ ਵਿਚ 5 ਵਿਕਟਾਂ ਗੁਆ ਕੇ ਹਾਸਲ ਕਰ ਲਿਆ.
ਪੰਜਾਬ ਲਈ ਨਿਕੋਲਸ ਪੂਰਨ ਨੇ ਸਭ ਤੋਂ ਵੱਧ 53 ਦੌੜਾਂ ਬਣਾਈਆਂ. ਪੂਰਨ ਨੇ 28 ਗੇਂਦਾਂ ਦਾ ਸਾਹਮਣਾ ਕੀਤਾ ਅਤੇ ਛੇ ਚੌਕੇ ਅਤੇ ਤਿੰਨ ਛੱਕੇ ਲਗਾਏ. ਇਸ ਤੋਂ ਇਲਾਵਾ ਗਲੇਨ ਮੈਕਸਵੈਲ ਨੇ 24 ਗੇਂਦਾਂ ਵਿਚ ਤਿੰਨ ਚੌਕਿਆਂ ਦੀ ਮਦਦ ਨਾਲ 32 ਦੌੜਾਂ ਬਣਾਈਆਂ ਜਦਕਿ ਕ੍ਰਿਸ ਗੇਲ ਨੇ 13 ਗੇਂਦਾਂ ਵਿਚ ਦੋ ਛੱਕਿਆਂ ਅਤੇ ਤਿੰਨ ਚੌਕਿਆਂ ਦੀ ਮਦਦ ਨਾਲ 29 ਦੌੜਾਂ ਬਣਾਈਆਂ.
ਕਪਤਾਨ ਲੋਕੇਸ਼ ਰਾਹੁਲ ਨੇ 15 ਦੌੜਾਂ ਬਣਾਈਆਂ. ਦੀਪਕ ਹੁੱਡਾ 15 ਅਤੇ ਜੇਮਜ਼ ਨੀਸ਼ਮ 10 ਦੌੜਾਂ ਬਣਾ ਕੇ ਨਾਬਾਦ ਪਰਤੇ. ਦਿੱਲੀ ਲਈ ਕਾਗੀਸੋ ਰਬਾਦਾ ਨੇ ਦੋ ਵਿਕਟ ਲਏ ਜਦਕਿ ਅਕਸ਼ਰ ਪਟੇਲ ਅਤੇ ਰਵੀਚੰਦਰਨ ਅਸ਼ਵਿਨ ਨੇ ਇਕ-ਇਕ ਵਿਕਟ ਹਾਸਲ ਕੀਤਾ.
ਮੈਚ ਤੋਂ ਬਾਅਦ ਅਈਅਰ ਨੇ ਕਿਹਾ, "ਮੈਂ ਸਮਝਦਾ ਹਾਂ ਕਿ ਅਸੀਂ 10 ਦੌੜਾਂ ਪਿੱਛੇ ਸੀ ਪਰ ਸਾਨੂੰ ਇਸ ਮੈਚ ਤੋਂ ਬਹੁਤ ਕੁਝ ਸਿੱਖਣ ਲਈ ਮਿਲਿਆ. ਸ਼ਿਖਰ ਦੀ ਬੱਲੇਬਾਜ਼ੀ ਸਾਡੇ ਲਈ ਬਹੁਤ ਵੱਡਾ ਸਕਾਰਾਤਮਕ ਪੱਖ ਸੀ. ਤੁਸ਼ਾਰ ਮਹਿੰਗੇ ਸਾਬਤ ਹੋਏ ਪਰ ਮੈਨੂੰ ਯਕੀਨ ਹੈ ਕਿ ਉਹ ਵਾਪਸੀ ਕਰਣਗੇ. ਇਹ ਸਵੀਕਾਰ ਕਰਨਾ ਪਏਗਾ ਕਿ ਅਸੀਂ ਅੱਜ ਆਪਣੇ ਪੱਧਰ ਨਾਲ ਇਨਸਾਫ ਨਹੀਂ ਕਰ ਸਕੇ, ਪਰ ਮੈਂ ਨਿਸ਼ਚਤ ਤੌਰ ਤੇ ਕਹਿ ਸਕਦਾ ਹਾਂ ਕਿ ਅਗਲੇ ਮੈਚ ਵਿੱਚ ਅਸੀਂ ਕੋਈ ਕਸਰ ਨਹੀਂ ਛੱਡਾਂਗੇ.”
ਇਸ ਜਿੱਤ ਤੋਂ ਬਾਅਦ ਪੰਜਾਬ ਦੀ ਟੀਮ ਅੱਠ ਅੰਕਾਂ ਨਾਲ ਪੰਜਵੇਂ ਸਥਾਨ 'ਤੇ ਪਹੁੰਚ ਗਈ ਹੈ. ਦਿੱਲੀ ਦੇ 14 ਅੰਕ ਹਨ ਅਤੇ ਉਹ ਅਜੇ ਵੀ ਪੁਆਇੰਟ ਟੇਬਲੇ ਤੇ ਸਿਖਰ 'ਤੇ ਹੈ.