ਜੋਸ਼ ਹੇਜ਼ਲਵੁੱਡ ਦੀ ਸ਼ਾਨਦਾਰ ਗੇਂਦਬਾਜ਼ੀ ਅਤੇ ਗਲੇਨ ਮੈਕਸਵੈਲ ਦੀ ਸ਼ਾਨਦਾਰ ਪਾਰੀ ਦੇ ਕਾਰਣ ਮੈਨਚੇਸਟਰ ਦੇ ਓਲਡ ਟ੍ਰੈਫੋਰਡ ਸਟੇਡੀਅਮ ਵਿਚ ਖੇਡੇ ਗਏ ਪਹਿਲੇ ਵਨਡੇ ਮੈਚ ਵਿਚ ਆਸਟਰੇਲੀਆ ਨੇ ਇੰਗਲੈਂਡ ਨੂੰ 19 ਦੌੜਾਂ ਨਾਲ ਹਰਾ ਦਿੱਤਾ ਹੈ. ਇਸਦੇ ਨਾਲ ਹੀ ਆਸਟਰੇਲੀਆ ਨੇ ਤਿੰਨ ਮੈਚਾਂ ਦੀ ਸੀਰੀਜ਼ ਵਿੱਚ 1-0 ਦੀ ਬੜ੍ਹਤ ਹਾਸਲ ਕਰ ਲਈ। ਆਸਟਰੇਲੀਆ ਦੀਆਂ 294 ਦੌੜਾਂ ਦੇ ਜਵਾਬ ਵਿਚ ਮੇਜ਼ਬਾਨ ਇੰਗਲੈਂਡ ਨਿਰਧਾਰਤ 50 ਓਵਰਾਂ ਵਿਚ 9 ਵਿਕਟਾਂ ਦੇ ਨੁਕਸਾਨ ‘ਤੇ 275 ਦੌੜਾਂ ਹੀ ਬਣਾ ਸਕੀ।
ਇੰਗਲੈਂਡ ਨੇ ਟੀਚੇ ਦਾ ਪਿੱਛਾ ਕਰਦਿਆਂ ਸ਼ੁਰੂਆਤ ਬਹੁਤ ਹੌਲੀ ਅਤੇ ਖਰਾਬ ਕੀਤੀ. 57 ਦੇ ਸਕੋਰ 'ਤੇ ਪਹੁੰਚਦਿਆਂ ਜੇਸਨ ਰਾਏ, ਜੋ ਰੂਟ, ਈਯਨ ਮੋਰਗਨ ਅਤੇ ਜੋਸ ਬਟਲਰ ਪਵੇਲੀਅਨ ਪਰਤ ਗਏ। ਫਿਰ ਜੌਨੀ ਬੇਅਰਸਟੋ ਨੇ ਸੈਮ ਬਿਲਿੰਗਜ਼ ਨਾਲ ਪੰਜਵੇਂ ਵਿਕਟ ਲਈ 113 ਦੌੜਾਂ ਜੋੜੀਆਂ. ਬੇਅਰਸਟੋ ਨੇ 107 ਗੇਂਦਾਂ ਵਿਚ 4 ਚੌਕਿਆਂ ਅਤੇ 4 ਛੱਕਿਆਂ ਦੀ ਮਦਦ ਨਾਲ 84 ਦੌੜਾਂ ਬਣਾਈਆਂ। ਇਸ ਦੇ ਨਾਲ ਹੀ ਬਿਲਿੰਗਜ਼ ਨੇ 110 ਗੇਂਦਾਂ 'ਚ 14 ਚੌਕਿਆਂ ਅਤੇ 2 ਛੱਕਿਆਂ ਦੀ ਮਦਦ ਨਾਲ 118 ਦੌੜਾਂ ਬਣਾਈਆਂ। ਕਿਸੇ ਵੀ ਖਿਡਾਰੀ ਨੇ ਦੂਜੇ ਸਿਰੇ ਤੋਂ ਬਿਲਿੰਗਜ਼ ਦਾ ਸਾਥ ਨਹੀਂ ਦਿੱਤਾ.
ਆਸਟਰੇਲੀਆ ਲਈ ਐਡਮ ਜੈਂਪਾ ਨੇ 10 ਓਵਰਾਂ ਵਿਚ 55 ਦੌੜਾਂ ਦੇ ਕੇ 4 ਵਿਕਟਾਂ ਲਈਆਂ। ਮੈਨ ਆਫ ਦਿ ਮੈਚ ਹੇਜ਼ਲਵੁੱਡ ਨੇ 10 ਓਵਰਾਂ ਵਿੱਚ 26 ਦੌੜਾਂ ਦੇ ਕੇ 3 ਵਿਕਟਾਂ ਹਾਸਲ ਕੀਤੀਆਂ। ਇਸ ਤੋਂ ਇਲਾਵਾ, ਮਿਸ਼ੇਲ ਮਾਰਸ਼ ਅਤੇ ਪੈਟ ਕਮਿੰਸ ਨੇ 1-1 ਵਿਕਟ ਲਏ.
ਇਸ ਤੋਂ ਪਹਿਲਾਂ ਮਿਡਲ ਆਰਡਰ ਵਿਚ ਗਲੇਨ ਮੈਕਸਵੈਲ ਅਤੇ ਮਿਸ਼ੇਲ ਮਾਰਸ਼ ਦੇ ਵਿਚਕਾਰ ਸ਼ਾਨਦਾਰ ਸੇਂਚੁਰੀ ਪਾਰਟਨਰਸ਼ਿਪ ਨੇ ਆਸਟਰੇਲੀਆ ਨੂੰ 50 ਓਵਰਾਂ ਵਿੱਚ 9 ਵਿਕਟਾਂ ਗੁਆ ਕੇ 294 ਦੇ ਸਕੋਰ ਤੱਕ ਪਹੁੰਚਾਇਆ. ਮੈਕਸਵੈੱਲ ਨੇ 59 ਗੇਂਦਾਂ ਵਿਚ ਚਾਰ ਚੌਕਿਆਂ ਅਤੇ ਚਾਰ ਛੱਕਿਆਂ ਦੀ ਮਦਦ ਨਾਲ 77 ਦੌੜਾਂ ਬਣਾਈਆਂ। ਮਾਰਸ਼ ਨੇ 100 ਗੇਂਦਾਂ ਵਿੱਚ ਛੇ ਚੌਕਿਆਂ ਦੀ ਮਦਦ ਨਾਲ 73 ਦੌੜਾਂ ਬਣਾਈਆਂ। ਟੀਮ ਨੇ ਆਖਰੀ ਪੰਜ ਓਵਰਾਂ ਵਿੱਚ ਸਿਰਫ 35 ਦੌੜਾਂ ਬਣਾਈਆਂ ਅਤੇ ਤਿੰਨ ਵਿਕਟਾਂ ਗੁਆ ਦਿੱਤੀਆਂ।
ਮਾਰਸ਼ ਅਤੇ ਮੈਕਸਵੈੱਲ ਨੇ ਛੇਵੇਂ ਵਿਕਟ ਲਈ 126 ਦੌੜਾਂ ਦੀ ਸਾਂਝੇਦਾਰੀ ਕੀਤੀ ਜੋ ਕਿ ਆਸਟਰੇਲੀਆ ਲਈ ਵਨਡੇ ਮੈਚਾਂ ਵਿੱਚ ਇੰਗਲੈਂਡ ਖਿਲਾਫ ਇਸ ਵਿਕਟ ਲਈ ਅਜੇ ਤੱਕ ਦੀ ਸਭ ਤੋਂ ਵੱਡੀ ਸਾਂਝੇਦਾਰੀ ਹੈ।
ਇੰਗਲੈਂਡ ਲਈ ਆਰਚਰ ਅਤੇ ਵੁੱਡ ਨੇ ਤਿੰਨ - ਤਿੰਨ ਵਿਕਟਾਂ ਲਈਆਂ। ਆਦਿਲ ਰਾਸ਼ਿਦ ਨੇ ਦੋ ਅਤੇ ਕ੍ਰਿਸ ਵੋਕਸ ਨੂੰ ਸਫਲਤਾ ਮਿਲੀ।