ਦੁਨੀਆ ਭਰ ਦੇ ਕ੍ਰਿਕਟ ਪ੍ਰਸ਼ੰਸਕ ਐਤਵਾਰ ਦੀ ਰਾਤ (28 ਅਗਸਤ) ਦੀ ਉਡੀਕ ਕਰ ਰਹੇ ਹਨ ਕਿਉਂਕਿ ਏਸ਼ੀਆ ਕੱਪ 2022 ਵਿੱਚ ਇਸ ਦਿਨ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਬਲਾਕਬਸਟਰ ਮੈਚ ਦੇਖਣ ਨੂੰ ਮਿਲੇਗਾ। ਇਸ ਮੈਚ 'ਚ ਦੋਵੇਂ ਟੀਮਾਂ ਦੇ ਕੁਝ ਵੱਡੇ ਖਿਡਾਰੀ ਨਹੀਂ ਹੋਣਗੇ ਪਰ ਇਸ ਦੇ ਬਾਵਜੂਦ ਪ੍ਰਸ਼ੰਸਕਾਂ ਦੇ ਮਨੋਰੰਜਨ 'ਚ ਕੋਈ ਕਮੀ ਨਹੀਂ ਹੋਣ ਵਾਲੀ ਹੈ। ਸ਼ਾਹੀਨ ਅਫਰੀਦੀ ਇਸ ਪੂਰੇ ਟੂਰਨਾਮੈਂਟ 'ਚ ਨਹੀਂ ਖੇਡਣਗੇ ਜੋ ਪਾਕਿਸਤਾਨ ਲਈ ਵੱਡਾ ਝਟਕਾ ਹੋਵੇਗਾ।
ਇਸ ਦੇ ਨਾਲ ਹੀ ਜਸਪ੍ਰੀਤ ਬੁਮਰਾਹ ਵੀ ਭਾਰਤ ਲਈ ਇਸ ਟੂਰਨਾਮੈਂਟ ਵਿੱਚ ਨਹੀਂ ਹਨ। ਅਜਿਹੇ 'ਚ ਮੁਕਾਬਲਾ ਬਰਾਬਰ ਦਾ ਹੋਣ ਜਾ ਰਿਹਾ ਹੈ। ਸ਼ਾਹੀਨ ਪਾਕਿਸਤਾਨ ਲਈ ਨਹੀਂ ਖੇਡਣਗੇ ਅਤੇ ਉਨ੍ਹਾਂ ਦੀ ਗੈਰਹਾਜ਼ਰੀ ਦਾ ਪਾਕਿਸਤਾਨ ਟੀਮ 'ਤੇ ਕੀ ਅਸਰ ਪਵੇਗਾ? ਜਦੋਂ ਇਹ ਸਵਾਲ ਬੀਸੀਸੀਆਈ ਦੇ ਪ੍ਰਧਾਨ ਅਤੇ ਸਾਬਕਾ ਭਾਰਤੀ ਕਪਤਾਨ ਸੌਰਵ ਗਾਂਗੁਲੀ ਨੂੰ ਪੁੱਛਿਆ ਗਿਆ ਤਾਂ ਉਨ੍ਹਾਂ ਨੇ ਇੱਕ ਲਾਈਨ ਵਿੱਚ ਜਵਾਬ ਦੇ ਕੇ ਆਪਣੀ ਗੱਲ ਖ਼ਤਮ ਕਰ ਦਿੱਤੀ।
ਗਾਂਗੁਲੀ ਨੇ ਇੰਡੀਆ ਟੂਡੇ ਨੂੰ ਕਿਹਾ, "ਮੈਨੂੰ ਨਹੀਂ ਲੱਗਦਾ ਕਿ ਇੱਕ ਖਿਡਾਰੀ ਫਰਕ ਲਿਆ ਸਕਦਾ ਹੈ। ਇਹ ਟੀਮ ਵਰਕ ਹੈ। ਸਾਡੇ ਕੋਲ ਜਸਪ੍ਰੀਤ ਬੁਮਰਾਹ ਵੀ ਨਹੀਂ ਹੈ।"
ਇਸ ਤੋਂ ਇਲਾਵਾ ਗਾਂਗੁਲੀ ਨੇ ਹਾਰਦਿਕ ਪੰਡਯਾ ਦੀ ਵਾਪਸੀ 'ਤੇ ਵੀ ਕਾਫੀ ਕੁਝ ਕਿਹਾ। ਉਸ ਨੇ ਕਿਹਾ, "ਬਿਲਕੁਲ, ਉਹ ਟੀਮ ਲਈ ਇੱਕ ਵੱਡਾ ਖਿਡਾਰੀ ਹੈ ਕਿਉਂਕਿ ਉਹ ਗੇਂਦਬਾਜ਼ੀ ਵੀ ਕਰ ਰਿਹਾ ਹੈ। ਪਿਛਲੇ ਸਾਲ ਉਹ ਗੇਂਦਬਾਜ਼ੀ ਕਰਨ ਲਈ ਫਿੱਟ ਨਹੀਂ ਸੀ, ਪਰ ਹੁਣ ਉਹ ਗੇਂਦਬਾਜ਼ੀ ਕਰ ਰਿਹਾ ਹੈ। ਇਸ ਲਈ ਉਹ ਇੱਕ ਵੱਡਾ ਖਿਡਾਰੀ ਹੈ। ਜਿੱਥੇ ਤੱਕ ਇਸ ਟੂਰਨਾਮੈਂਟ ਦੀ ਪਸੰਦੀਦਾ ਟੀਮ ਦਾ ਸਵਾਲ ਹੈ ਤਾਂ ਟੀ-20 ਫਾਰਮੈਟ ਵਿੱਚ ਕੋਈ ਟੀਮ ਪਸੰਦੀਦਾ ਨਹੀਂ ਹੈ। ਕੀ ਕਿਸੇ ਨੇ ਗੁਜਰਾਤ ਨੂੰ ਆਈਪੀਐਲ ਜਿੱਤਣ ਬਾਰੇ ਸੋਚਿਆ ਸੀ। ਇਹ ਬਿਲਕੁਲ ਵੱਖਰਾ ਫਾਰਮੈਟ ਹੈ। ਤੁਹਾਡੇ ਕੋਲ ਰਿਕਵਰ ਹੋਣ ਲਈ ਬਹੁਤ ਘੱਟ ਸਮਾਂ ਹੁੰਦਾ ਹੈ।"