ਜਦੋਂ ਚੇਨਈ ਨੇ ਬੈਂਚ 'ਤੇ ਬਿਠਾਇਆ ਤਾਂ ਤੇਜ਼ ਖੇਡਣਾ ਸਿੱਖ ਗਏ ਚੇਤੇਸ਼ਵਰ ਪੁਜਾਰਾ

ਚੇਤੇਸ਼ਵਰ ਪੁਜਾਰਾ ਆਪਣੇ ਅੰਤਰਰਾਸ਼ਟਰੀ ਡੈਬਿਊ ਤੋਂ ਹੀ ਟੈਸਟ ਸਪੈਸ਼ਲਿਸਟ ਵਜੋਂ ਜਾਣੇ ਜਾਂਦੇ ਹਨ। ਹਾਲਾਂਕਿ ਹਾਲ ਹੀ 'ਚ ਪੁਜਾਰਾ ਨੇ ਆਪਣੀ ਬੱਲੇਬਾਜ਼ੀ ਦਾ ਵੱਖਰਾ ਪੱਖ ਦਿਖਾਇਆ ਹੈ। ਸਸੇਕਸ ਦੀ ਕਪਤਾਨੀ ਕਰ ਰਹੇ ਪੁਜਾਰਾ ਨੇ ਇੰਗਲੈਂਡ 'ਚ ਰਾਇਲ ਲੰਦਨ ਵਨ ਡੇ ਕੱਪ 'ਚ ਧਮਾਕੇਦਾਰ ਬੱਲੇਬਾਜ਼ੀ ਕੀਤੀ। ਪੁਜਾਰਾ ਨੇ 89.14 ਦੀ ਔਸਤ ਅਤੇ 111.62 ਦੀ ਚੰਗੀ ਸਟ੍ਰਾਈਕ ਰੇਟ ਨਾਲ 624 ਦੌੜਾਂ ਬਣਾਈਆਂ।

ਇਸ ਦੌਰਾਨ ਭਾਰਤੀ ਬੱਲੇਬਾਜ਼ ਨੇ ਤਿੰਨ ਸੈਂਕੜੇ ਅਤੇ ਦੋ ਅਰਧ ਸੈਂਕੜੇ ਵੀ ਲਗਾਏ। ਪੁਜਾਰਾ ਦੇ ਸਾਰੇ ਸੈਂਕੜੇ 130 ਤੋਂ ਵੱਧ ਦੀ ਸਟ੍ਰਾਈਕ ਰੇਟ 'ਤੇ ਬਣੇ। ਪੁਜਾਰਾ ਦੀ ਇਸ ਬੱਲੇਬਾਜ਼ੀ ਨੂੰ ਦੇਖ ਕੇ ਭਾਰਤੀ ਪ੍ਰਸ਼ੰਸਕਾਂ ਦੇ ਹੋਸ਼ ਉੱਡ ਗਏ ਕਿਉਂਕਿ ਕਿਸੇ ਨੇ ਨਹੀਂ ਸੋਚਿਆ ਸੀ ਕਿ ਪੁਜਾਰਾ ਵੀ ਅਜਿਹੀ ਬੱਲੇਬਾਜ਼ੀ ਕਰ ਸਕਦਾ ਹੈ ਪਰ ਹੁਣ ਜਦੋਂ ਪੁਜਾਰਾ ਨੇ ਕਰ ਦਿਖਾਇਆ ਹੈ ਤਾਂ ਆਉਣ ਵਾਲੇ ਆਈ.ਪੀ.ਐੱਲ. 'ਚ ਸ਼ਾਇਦ ਉਸ ਵਿਚ ਕੋਈ ਫਰੈਂਚਾਈਜ਼ੀ ਦਿਲਚਸਪੀ ਦਿਖਾਵੇ।

ਪੁਜਾਰਾ ਨੂੰ ਇੰਡੀਅਨ ਪ੍ਰੀਮੀਅਰ ਲੀਗ (IPL) 2021 ਲਈ ਚੇਨਈ ਸੁਪਰ ਕਿੰਗਜ਼ (CSK) ਨੇ ਖਰੀਦਿਆ ਸੀ ਪਰ ਕਦੇ ਵੀ ਖੇਡਣ ਦਾ ਮੌਕਾ ਨਹੀਂ ਮਿਲਿਆ। ਪਰ ਹੁਣ ਪੁਜਾਰਾ ਨੇ ਖੁਦ ਖੁਲਾਸਾ ਕੀਤਾ ਹੈ ਕਿ ਇਹ ਉਹ ਸੀਜ਼ਨ ਸੀ ਜਿੱਥੋਂ ਉਨ੍ਹਾਂ ਦੀ ਖੇਡ ਬਦਲ ਗਈ। ਆਪਣੀ ਪਹੁੰਚ ਵਿੱਚ ਬਦਲਾਅ ਬਾਰੇ ਗੱਲ ਕਰਦੇ ਹੋਏ ਪੁਜਾਰਾ ਨੇ ਦੱਸਿਆ ਕਿ ਆਈਪੀਐਲ ਦੇ ਉਸ ਸੀਜ਼ਨ ਵਿੱਚ ਬੈਂਚ 'ਤੇ ਬੈਠਣ ਤੋਂ ਬਾਅਦ ਵੀ ਉਨ੍ਹਾਂ ਦੀ ਖੇਡ ਕਿਵੇਂ ਬਦਲ ਗਈ ਸੀ।

ਦ ਕ੍ਰਿਕੇਟ ਪੋਡਕਾਸਟ 'ਤੇ ਬੋਲਦੇ ਹੋਏ ਪੁਜਾਰਾ ਨੇ ਕਿਹਾ, ''ਇਹ ਯਕੀਨੀ ਤੌਰ 'ਤੇ ਮੇਰੀ ਖੇਡ ਦਾ ਵੱਖਰਾ ਪੱਖ ਹੈ। ਬਿਨਾਂ ਸ਼ੱਕ ਪਿੱਚਾਂ ਸਮਤਲ ਸਨ, ਉਹ ਚੰਗੀਆਂ ਸਨ ਪਰ ਉਨ੍ਹਾਂ ਪਿੱਚਾਂ 'ਤੇ ਵੀ, ਤੁਹਾਨੂੰ ਉੱਚ ਸਟ੍ਰਾਈਕ ਰੇਟ ਨਾਲ ਸਕੋਰ ਕਰਨ ਦਾ ਇਰਾਦਾ ਹੋਣਾ ਚਾਹੀਦਾ ਹੈ। ਇਹ ਉਹ ਚੀਜ਼ ਹੈ ਜਿਸ 'ਤੇ ਮੈਂ ਹਮੇਸ਼ਾ ਕੰਮ ਕੀਤਾ ਹੈ। ਮੈਂ ਇੱਕ ਸਾਲ ਪਹਿਲਾਂ ਸੀਐਸਕੇ ਦਾ ਹਿੱਸਾ ਸੀ ਅਤੇ ਮੈਂ ਕੋਈ ਮੈਚ ਨਹੀਂ ਖੇਡਿਆ ਸੀ ਪਰ ਮੈਂ ਲੋਕਾਂ ਦੀ ਤਿਆਰੀ ਦੇ ਤਰੀਕਿਆਂ ਨੂੰ ਦੇਖਿਆ ਅਤੇ ਮੈਂ ਆਪਣੇ ਆਪ ਨੂੰ ਕਿਹਾ ਕਿ ਜੇਕਰ ਮੈਂ ਇੱਕ ਛੋਟਾ ਫਾਰਮੈਟ ਖੇਡਣਾ ਚਾਹੁੰਦਾ ਹਾਂ ਤਾਂ ਮੈਨੂੰ ਥੋੜਾ ਹੋਰ ਨਿਡਰ ਹੋਣਾ ਚਾਹੀਦਾ ਹੈ।"

ਅੱਗੇ ਬੋਲਦੇ ਹੋਏ ਪੁਜਾਰਾ ਨੇ ਕਿਹਾ, ''ਮੈਂ ਹਮੇਸ਼ਾ ਆਪਣੇ ਵਿਕਟ ਦੀ ਕੀਮਤ ਰੱਖੀ ਹੈ ਪਰ ਛੋਟੇ ਫਾਰਮੈਟਾਂ 'ਚ ਤੁਸੀਂ ਅਜੇ ਵੀ ਆਪਣੇ ਸ਼ਾਟ ਖੇਡਣਾ ਚਾਹੁੰਦੇ ਹੋ। ਤੁਸੀਂ ਆਪਣੀ ਗੇਮ ਵਿੱਚ ਥੋੜੇ ਹੋਰ ਸ਼ਾਟ ਜੋੜਨ ਦੀ ਕੋਸ਼ਿਸ਼ ਕਰਦੇ ਹੋ। ਇਹ ਉਹ ਚੀਜ਼ ਹੈ ਜਿਸ 'ਤੇ ਮੈਂ ਲੰਦਨ ਕੱਪ ਸ਼ੁਰੂ ਹੋਣ ਤੋਂ ਪਹਿਲਾਂ ਕੰਮ ਕੀਤਾ ਸੀ।"