ਨਿਤੀਸ਼ ਰਾਣਾ (ਅਜੇਤੂ 48) ਅਤੇ ਰਿੰਕੂ ਸਿੰਘ (ਅਜੇਤੂ 42) ਦੀ ਸ਼ਾਨਦਾਰ ਬੱਲੇਬਾਜ਼ੀ ਦੀ ਬਦੌਲਤ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇਕੇਆਰ) ਨੇ ਇੱਥੇ ਵਾਨਖੇੜੇ ਸਟੇਡੀਅਮ ਵਿੱਚ ਖੇਡੇ ਗਏ ਆਈਪੀਐਲ 2022 ਦੇ 47ਵੇਂ ਮੈਚ ਵਿੱਚ ਰਾਜਸਥਾਨ ਰਾਇਲਜ਼ (ਆਰਆਰ) ਨੂੰ ਸੱਤ ਵਿਕਟਾਂ ਨਾਲ ਹਰਾ ਦਿੱਤਾ। ਸੋਮਵਾਰ ਨੂੰ ਖੇਡੇ ਗਏ ਇਸ ਮੈਚ ਵਿਚ ਰਾਜਸਥਾਨ ਨੇ 20 ਓਵਰਾਂ 'ਚ ਪੰਜ ਵਿਕਟਾਂ ਦੇ ਨੁਕਸਾਨ 'ਤੇ 152 ਦੌੜਾਂ ਬਣਾਈਆਂ ਪਰ ਇਹ ਦੌੜ੍ਹਾਂ ਨਾਕਾਫੀ ਸਾਬਿਤ ਹੋਈਆਂ।
ਲਗਾਤਾਰ ਪੰਜ ਹਾਰਾਂ ਤੋਂ ਬਾਅਦ ਕੋਲਕਾਤਾ ਦੀ ਇਹ ਚੌਥੀ ਜਿੱਤ ਹੈ ਅਤੇ ਰਾਜਸਥਾਨ ਦੀ ਇਸ ਸੀਜ਼ਨ ਦੀ ਚੌਥੀ ਹਾਰ ਹੈ। ਰਿੰਕੂ ਸਿੰਘ ਨੂੰ ਉਸ ਦੀ ਸ਼ਾਨਦਾਰ ਬੱਲੇਬਾਜ਼ੀ ਲਈ ਕੇਕੇਆਰ ਵੱਲੋਂ 'ਪਲੇਅਰ ਆਫ਼ ਦਾ ਮੈਚ' ਦਾ ਪੁਰਸਕਾਰ ਦਿੱਤਾ ਗਿਆ। ਰਾਜਸਥਾਨ ਵੱਲੋਂ ਦਿੱਤੇ 153 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਕੇਕੇਆਰ ਟੀਮ ਦੀ ਸ਼ੁਰੂਆਤ ਖ਼ਰਾਬ ਰਹੀ। ਬਾਬਾ ਇੰਦਰਜੀਤ ਸਿੰਘ ਅਤੇ ਆਰੋਨ ਫਿੰਚ ਨੇ ਪਾਰੀ ਦੀ ਸ਼ੁਰੂਆਤ ਕੀਤੀ।
ਰਾਜਸਥਾਨ ਲਈ ਦੂਜੀ ਪਾਰੀ ਦਾ ਪਹਿਲਾ ਓਵਰ ਟ੍ਰੇਂਟ ਬੋਲਟ ਨੇ ਕੀਤਾ। ਬੋਲਟ ਨੇ ਪਹਿਲੇ ਓਵਰ 'ਚ ਸਿਰਫ 6 ਦੌੜਾਂ ਦਿੱਤੀਆਂ। ਇਸ ਦੇ ਨਾਲ ਹੀ ਗੇਂਦਬਾਜ਼ ਕੁਲਦੀਪ ਸੇਨ ਨੇ ਆਪਣੇ ਓਵਰ ਦੀ ਪਹਿਲੀ ਗੇਂਦ 'ਤੇ ਆਰੋਨ ਫਿੰਚ (4) ਨੂੰ ਕਲੀਨ ਬੋਲਡ ਕਰ ਦਿੱਤਾ। ਉਨ੍ਹਾਂ ਦੇ ਆਊਟ ਹੋਣ ਤੋਂ ਬਾਅਦ ਕਪਤਾਨ ਸ਼੍ਰੇਅਸ ਅਈਅਰ ਕ੍ਰੀਜ਼ 'ਤੇ ਆਏ।
ਗੇਂਦਬਾਜ਼ ਕ੍ਰਿਸ਼ਨਾ ਵੀ ਆਪਣੇ ਕਾਰਨਾਮੇ ਦਿਖਾਉਣ ਤੋਂ ਪਿੱਛੇ ਨਹੀਂ ਹਟਿਆ। ਉਸ ਨੇ ਬਾਬਾ ਇੰਦਰਜੀਤ ਨੂੰ ਆਪਣੇ ਓਵਰ ਵਿੱਚ ਆਉਟ ਕਰਵਾ ਦਿੱਤਾ। ਇਸ ਦੌਰਾਨ ਇਹ ਬੱਲੇਬਾਜ਼ 15 ਦੌੜਾਂ ਹੀ ਬਣਾ ਸਕਿਆ। ਇਸ ਦੇ ਨਾਲ ਹੀ ਪਾਵਰਪਲੇ ਦੇ ਦੌਰਾਨ ਕੋਲਕਾਤਾ ਨੇ ਦੋ ਵਿਕਟਾਂ ਦੇ ਨੁਕਸਾਨ 'ਤੇ 32 ਦੌੜਾਂ ਬਣਾਈਆਂ। ਉਸ ਤੋਂ ਬਾਅਦ ਕਪਤਾਨ ਸ਼੍ਰੇਅਸ ਅਈਅਰ ਅਤੇ ਨਿਤੀਸ਼ ਰਾਣਾ ਨੇ ਸ਼ਾਨਦਾਰ ਪਾਰੀ ਖੇਡੀ ਅਤੇ ਤੀਜੇ ਵਿਕਟ ਲਈ 60 ਦੌੜਾਂ ਜੋੜੀਆਂ।
ਹਾਲਾਂਕਿ, ਗੇਂਦਬਾਜ਼ ਬੋਲਟ ਦੇ ਓਵਰ ਦੀ ਪੰਜਵੀਂ ਗੇਂਦ 'ਤੇ ਅਈਅਰ ਕਪਤਾਨ ਸੰਜੂ ਸੈਮਸਨ ਦੇ ਹੱਥੋਂ ਕੈਚ ਹੋ ਗਏ। ਇਸ ਦੌਰਾਨ ਅਈਅਰ ਨੇ 32 ਗੇਂਦਾਂ ਵਿੱਚ ਤਿੰਨ ਚੌਕਿਆਂ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 34 ਦੌੜਾਂ ਬਣਾਈਆਂ। ਇਸ ਤੋਂ ਬਾਅਦ ਰਿੰਕੂ ਸਿੰਘ ਨੇ ਕ੍ਰੀਜ਼ 'ਤੇ ਆ ਕੇ ਬਾਊਂਡਰੀ ਨਾਲ ਪਾਰੀ ਦੀ ਸ਼ੁਰੂਆਤ ਕੀਤੀ। ਕੋਲਕਾਤਾ ਨੇ 17ਵੇਂ ਓਵਰ ਤੱਕ ਤਿੰਨ ਵਿਕਟਾਂ ਦੇ ਨੁਕਸਾਨ 'ਤੇ 122 ਦੌੜਾਂ ਬਣਾਈਆਂ ਸਨ।
ਰਿੰਕੂ ਸਿੰਘ ਨੇ ਆਪਣਾ ਹਮਲਾ ਜਾਰੀ ਰੱਖਦੇ ਹੋਏ ਚਹਿਲ ਦੇ ਓਵਰ ਦੀਆਂ ਪਹਿਲੀਆਂ ਦੋ ਗੇਂਦਾਂ 'ਤੇ ਦੋ ਚੌਕੇ ਲਗਾਏ ਅਤੇ ਤੀਜੀ ਗੇਂਦ 'ਤੇ ਸਿੰਗਲ ਲਿਆ। ਚਾਹਲ ਦੇ ਆਖਰੀ ਓਵਰ ਵਿੱਚ ਬੱਲੇਬਾਜ਼ਾਂ ਨੇ 12 ਦੌੜਾਂ ਬਣਾਈਆਂ ਅਤੇ ਹੁਣ ਟੀਮ ਨੂੰ ਜਿੱਤ ਲਈ 12 ਗੇਂਦਾਂ ਵਿੱਚ 18 ਦੌੜਾਂ ਦੀ ਲੋੜ ਸੀ। ਬੱਲੇਬਾਜ਼ ਰਿੰਕੂ ਅਤੇ ਰਾਣਾ ਨੇ ਇਹ ਕੰਮ ਆਸਾਨੀ ਨਾਲ ਪੂਰਾ ਕਰ ਲਿਆ।