ਮੁਹੰਮਦ ਸਿਰਾਜ ਨੇ ਆਪਣੇ ਜ਼ਿਆਦਾਤਰ ਅੰਤਰਰਾਸ਼ਟਰੀ ਅਤੇ ਆਈਪੀਐਲ ਮੈਚ ਵਿਰਾਟ ਕੋਹਲੀ ਦੀ ਅਗਵਾਈ ਵਿੱਚ ਖੇਡੇ ਹਨ। ਇਸ ਤੇਜ਼ ਗੇਂਦਬਾਜ਼ ਨੇ ਹਾਲ ਹੀ ਦੇ ਮਹੀਨਿਆਂ ਵਿੱਚ ਆਪਣੀ ਗੇਂਦਬਾਜ਼ੀ ਨਾਲ ਸਭ ਦਾ ਦਿਲ ਜਿੱਤ ਲਿਆ ਹੈ। ਪਰ ਹੁਣ ਸਿਰਾਜ ਨੇ ਆਪਣੀ ਸਫਲਤਾ ਦਾ ਰਾਜ਼ ਜ਼ਾਹਰ ਕਰ ਦਿੱਤਾ ਹੈ।
27 ਸਾਲਾ ਇਸ ਤੇਜ਼ ਗੇਂਦਬਾਜ਼ ਨੇ ਪਿਛਲੇ ਸਾਲ ਆਸਟਰੇਲੀਆ ਵਿੱਚ ਲੜੀ ਦੌਰਾਨ ਆਪਣੇ ਪਿਤਾ ਨੂੰ ਗੁਆ ਦਿੱਤਾ ਸੀ ਅਤੇ ਹੁਣ ਖਿਡਾਰੀ ਨੇ ਆਪਣੇ ਮੁਸ਼ਕਲ ਪੜਾਅ ਬਾਰੇ ਖੁੱਲ੍ਹ ਕੇ ਦੱਸਿਆ ਹੈ। ਟਾਈਮਜ਼ ਆਫ ਇੰਡੀਆ ਨਾਲ ਇਕ ਵਿਸ਼ੇਸ਼ ਗੱਲਬਾਤ ਵਿਚ ਮੁਹੰਮਦ ਸਿਰਾਜ ਨੇ ਬਹੁਤ ਸਾਰੀਆਂ ਗੱਲਾਂ ਕਹੀਆਂ ਹਨ।
ਸਿਰਾਜ ਨੇ ਆਸਟਰੇਲੀਆ ਦੌਰੇ ਨੂੰ ਯਾਦ ਕਰਦਿਆਂ ਕਿਹਾ, “ਮੈਂ ਆਸਟ੍ਰੇਲੀਆ ਸੀਰੀਜ਼ ਦੌਰਾਨ ਆਪਣੇ ਪਿਤਾ ਨੂੰ ਗੁਆ ਦਿੱਤਾ। ਮੈਂ ਚਕਨਾਚੂਰ ਸੀ ਅਤੇ ਅਸਲ ਵਿਚ ਮੈਂ ਹੋਸ਼ ਵਿਚ ਨਹੀਂ ਸੀ। ਇਹ ਵਿਰਾਟ ਭਈਆ ਨੇ ਮੈਨੂੰ ਤਾਕਤ ਅਤੇ ਸਮਰਥਨ ਦਿੱਤਾ। ਮੇਰਾ ਕਰੀਅਰ ਵਿਰਾਟ ਭਈਆ ਨੇ ਬਣਾਇਆ ਹੈ। ਉਸਨੇ ਮੇਰਾ ਹਰ ਸਮੇਂ ਸਮਰਥਨ ਕੀਤਾ। ਉਹ ਹਮੇਸ਼ਾ ਹਰ ਹਾਲ ਵਿਚ ਮੇਰੇ ਲਈ ਰਿਹਾ ਹੈ।"
ਅੱਗੇ ਬੋਲਦਿਆਂ ਗੇਂਦਬਾਜ਼ ਨੇ ਕਿਹਾ, "ਮੈਨੂੰ ਅਜੇ ਵੀ ਯਾਦ ਹੈ ਕਿ ਮੈਂ ਹੋਟਲ ਦੇ ਕਮਰੇ ਵਿੱਚ ਕਿਵੇਂ ਰੋ ਰਿਹਾ ਸੀ। ਵਿਰਾਟ ਭਈਆ ਮੇਰੇ ਕਮਰੇ ਵਿਚ ਆਏ ਅਤੇ ਮੈਨੂੰ ਜੱਫੀ ਪਾ ਕੇ ਕਿਹਾ - 'ਮੈਂ ਤੁਹਾਡੇ ਨਾਲ ਹਾਂ, ਚਿੰਤਾ ਨਾ ਕਰੋ।' ਉਨ੍ਹਾਂ ਸ਼ਬਦਾਂ ਨੇ ਮੈਨੂੰ ਬਹੁਤ ਉਤਸ਼ਾਹ ਦਿੱਤਾ। ਉਸ ਨੇ (ਵਿਰਾਟ) ਦੌਰੇ 'ਤੇ ਸਿਰਫ ਇਕ ਟੈਸਟ ਖੇਡਿਆ ਸੀ ਪਰ ਉਸ ਦੇ ਸੰਦੇਸ਼ ਅਤੇ ਕਾਲ ਨੇ ਹਮੇਸ਼ਾਂ ਮੈਨੂੰ ਪ੍ਰੇਰਿਤ ਕੀਤਾ ਅਤੇ ਇਸੇ ਲਈ ਮੈਂ ਪ੍ਰਦਰਸ਼ਨ ਕਰ ਸਕਿਆ।'