'ਨਾ ਲੰਬੇ ਵਾਲ ਅਤੇ ਨਾ ਹੀ ਸੋਸ਼ਲ ਮੀਡੀਆ', ਬੰਗਾਲ ਦੇ ਕੋਚ ਨੇ ਨੌਜਵਾਨ ਖਿਡਾਰੀਆਂ 'ਤੇ ਕੱਸਿਆ ਸ਼ਿਕੰਜਾ

ਬੰਗਾਲ ਅੰਡਰ-23 ਦੇ ਕੋਚ ਲਕਸ਼ਮੀ ਰਤਨ ਸ਼ੁਕਲਾ ਨੇ ਨੌਜਵਾਨ ਖਿਡਾਰੀਆਂ ਲਈ ਸਖਤ ਨਿਯਮ ਬਣਾ ਕੇ ਸ਼ਿਕੰਜਾ ਕੱਸਿਆ ਹੈ। ਸ਼ੁਕਲਾ ਨੇ ਨੌਜਵਾਨ ਕ੍ਰਿਕਟਰਾਂ ਨੂੰ ਸੋਸ਼ਲ ਮੀਡੀਆ ਤੋਂ ਦੂਰ ਰਹਿਣ ਦੀ ਹਦਾਇਤ ਕੀਤੀ ਹੈ ਅਤੇ ਲੰਬੇ ਵਾਲਾਂ ਵਾਲੇ ਖਿਡਾਰੀਆਂ ਨੂੰ ਆਪਣੇ ਵਾਲ ਕੱਟਣ ਦੇ ਆਦੇਸ਼ ਦਿੱਤੇ ਹਨ।

ਬੰਗਾਲ ਅੰਡਰ-23 ਦੇ ਖਿਡਾਰੀਆਂ ਲਈ ਫਿਟਨੇਸ ਕੈਂਪ ਦੀ ਸ਼ੁਰੂਆਤ ਸੋਮਵਾਰ ਨੂੰ ਲਕਸ਼ਮੀ ਰਤਨ ਸ਼ੁਕਲਾ ਦੀ ਨਿਗਰਾਨੀ ਹੇਠ 60 ਕ੍ਰਿਕਟਰਾਂ ਨਾਲ ਹੋਈ। ਸ਼ੁਕਲਾ ਨੇ ਭਾਰਤ ਲਈ ਤਿੰਨ ਵਨਡੇ ਮੈਚ ਖੇਡੇ ਹਨ ਪਰ ਉਸ ਤੋਂ ਬਾਅਦ ਉਸ ਨੂੰ ਭਾਰਤ ਲਈ ਖੇਡਣ ਦਾ ਮੌਕਾ ਨਹੀਂ ਮਿਲਿਆ।

ਸਖਤ ਨਿਯਮਾਂ ਬਾਰੇ ਗੱਲ ਕਰਦਿਆਂ ਸ਼ੁਕਲਾ ਨੇ ਦਿ ਇੰਡੀਅਨ ਐਕਸਪ੍ਰੈਸ ਨਾਲ ਗੱਲਬਾਤ ਦੌਰਾਨ ਕਿਹਾ, “ਮੈਂ ਮੁੰਡਿਆਂ ਨੂੰ ਕਿਹਾ ਹੈ ਕਿ ਉਹ ਸੋਸ਼ਲ ਮੀਡੀਆ ਉੱਤੇ ਕੁਝ ਵੀ ਪੋਸਟ ਨਾ ਕਰਨ। ਉਨ੍ਹਾਂ ਨੂੰ ਮਰਿਆਦਾ ਅਤੇ ਅਨੁਸ਼ਾਸਨ ਕਾਇਮ ਰੱਖਣਾ ਹੈ। ਲੰਬੇ ਵਾਲਾਂ ਵਾਲੇ ਲੋਕਾਂ ਨੂੰ ਤੁਰੰਤ ਸੈਲੂਨ ਜਾਣਾ ਪਵੇਗਾ। ਤੀਜਾ, ਉਹਨਾਂ ਨੂੰ ਟੀਮ ਬਾਂਡਿੰਗ ਲਈ ਬੰਗਲਾ ਸਿੱਖਣੀ ਪਏਗੀ।"

ਅੱਗੇ ਬੋਲਦਿਆਂ ਉਨ੍ਹਾਂ ਕਿਹਾ, “ਜੂਨੀਅਰ ਤੋਂ ਸੀਨੀਅਰ ਟੀਮ ਦਾ ਸਫ਼ਰ ਬਹੁਤ ਮਹੱਤਵਪੂਰਨ ਹੈ ਅਤੇ ਇਸੇ ਲਈ ਮੈਂ ਜੂਨੀਅਰ ਕ੍ਰਿਕਟਰਾਂ ਨਾਲ ਕੰਮ ਕਰਨ ਦਾ ਫੈਸਲਾ ਕੀਤਾ ਹੈ। ਮੈਂ ਜ਼ਿਲ੍ਹੇ ਤੋਂ ਹੋਰ ਕ੍ਰਿਕਟਰਾਂ ਨੂੰ ਮੁੰਡਿਆਂ ਅਤੇ ਕੁੜੀਆਂ ਦੋਵਾਂ ਨੂੰ ਆਉਂਦੇ ਵੇਖਣਾ ਚਾਹੁੰਦਾ ਹਾਂ। ਕੈਬ ਜ਼ਿਲ੍ਹਾ ਖੇਡਾਂ ਦੇ ਨਾਲ-ਨਾਲ ਕਲੱਬ ਦੀਆਂ ਖੇਡਾਂ ਪ੍ਰਤੀ ਵੀ ਬਹੁਤ ਗੰਭੀਰ ਹੈ ਅਤੇ ਐਸੋਸੀਏਸ਼ਨ ਤਰੱਕੀ ਲਈ ਹਰ ਯਤਨ ਕਰ ਰਹੀ ਹੈ।"