ਮੈਥਿਊ ਵੇਡ ਨੂੰ IPL 'ਚ ਜਗ੍ਹਾ ਕਿਉਂ ਨਹੀਂ ਮਿਲੀ? ਸਾਬਕਾ ਖਿਡਾਰੀ ਨੇ ਦਿੱਤਾ ਜਵਾਬ

Cricket Image for ਮੈਥਿਊ ਵੇਡ ਨੂੰ IPL 'ਚ ਜਗ੍ਹਾ ਕਿਉਂ ਨਹੀਂ ਮਿਲੀ? ਸਾਬਕਾ ਖਿਡਾਰੀ ਨੇ ਦਿੱਤਾ ਜਵਾਬ (Image Source: Google)

ਆਸਟ੍ਰੇਲੀਆ ਦੇ ਵਿਕਟਕੀਪਰ ਬੱਲੇਬਾਜ਼ ਮੈਥਿਊ ਵੇਡ ਸੁਰਖੀਆਂ 'ਚ ਬਣੇ ਹੋਏ ਹਨ। ਮੈਥਿਊ ਵੇਡ ਨੇ ਲਗਾਤਾਰ ਤਿੰਨ ਛੱਕੇ ਲਗਾ ਕੇ ਆਸਟਰੇਲੀਆ ਨੂੰ ਪਾਕਿਸਤਾਨ ਦੇ ਖਿਲਾਫ ਸੈਮੀਫਾਈਨਲ ਜਿੱਤਣ ਵਿੱਚ ਮਦਦ ਕੀਤੀ ਸੀ। ਮੈਥਿਊ ਵੇਡ ਦੀ ਇਸ ਧਮਾਕੇਦਾਰ ਪਾਰੀ ਤੋਂ ਬਾਅਦ ਪ੍ਰਸ਼ੰਸਕ ਉਸ ਨੂੰ IPL 'ਚ ਮੌਕਾ ਦੇਣ ਦੀ ਗੱਲ ਕਰ ਰਹੇ ਹਨ। ਮੈਥਿਊ ਵੇਡ ਲੰਬੇ ਸਮੇਂ ਤੋਂ IPL 'ਚ ਖਰੀਦਦਾਰ ਦੀ ਉਡੀਕ ਕਰ ਰਹੇ ਹਨ।

ਮੈਥਿਊ ਵੇਡ ਨੂੰ ਹੁਣ ਤੱਕ ਆਈਪੀਐਲ ਵਿੱਚ ਰੈਗੂਲਰ ਮੌਕਾ ਨਾ ਮਿਲਣ ਦਾ ਕਾਰਨ ਸਾਬਕਾ ਆਸਟਰੇਲੀਆਈ ਕ੍ਰਿਕਟਰ ਬ੍ਰੈਡ ਹੌਗ ਨੇ ਦੱਸਿਆ ਹੈ। ਬ੍ਰੈਡ ਹੌਗ ਨੇ ਆਪਣੇ ਯੂਟਿਊਬ ਚੈਨਲ 'ਤੇ ਬੋਲਦੇ ਹੋਏ ਕਿਹਾ, 'ਵੇਡ ਵਿਚ ਇਕਸਾਰਤਾ ਦੀ ਘਾਟ ਹੈ। ਉਹ ਕਦੇ ਵੀ ਮੇਰਾ ਫਰੰਟਲਾਈਨ ਸਿਲੈਕਸ਼ਨ ਨਹੀਂ ਹੋਵੇਗਾ।'

ਅੱਗੇ ਬੋਲਦੇ ਹੋਏ ਹੌਗ ਨੇ ਕਿਹਾ,  'ਵੇਡ ਨੇ ਸੈਮੀਫਾਈਨਲ ਮੈਚ 'ਚ ਜੋ ਕੀਤਾ, ਉਹ ਸਿਰਫ ਇਕ ਮੈਚ ਦਾ ਮਾਮਲਾ ਸੀ। ਉਸ ਦਿਨ ਉਸਦੀ ਕਿਸਮਤ ਨੇ ਉਸਦਾ ਸਾਥ ਦਿੱਤਾ। ਕੀ ਤੁਸੀਂ ਉਸ ਪ੍ਰਦਰਸ਼ਨ ਦੇ ਆਧਾਰ 'ਤੇ ਉਸ ਨੂੰ ਆਈਪੀਐੱਲ 'ਚ ਚੁਣੋਗੇ? ਨਹੀਂ ਮੈਂ ਨਹੀਂ ਕਰਾਂਗਾ। ਤੁਹਾਨੂੰ ਦੇਖਣਾ ਹੋਵੇਗਾ ਕਿ ਉਹ ਅਗਲੇ ਕੁਝ ਮਹੀਨਿਆਂ 'ਚ ਕਿਹੋ ਜਿਹਾ ਪ੍ਰਦਰਸ਼ਨ ਕਰਦਾ ਹੈ।'

ਦੱਸ ਦੇਈਏ ਕਿ ਪਾਕਿਸਤਾਨ ਖਿਲਾਫ ਖੇਡੇ ਗਏ ਸੈਮੀਫਾਈਨਲ ਮੈਚ 'ਚ ਵੇਡ ਨੇ 17 ਗੇਂਦਾਂ 'ਚ 41 ਦੌੜਾਂ ਦੀ ਧਮਾਕੇਦਾਰ ਪਾਰੀ ਖੇਡੀ ਸੀ। ਇਸ ਪਾਰੀ ਲਈ ਉਸ ਨੂੰ ਪਲੇਅਰ ਆਫ ਦਿ ਮੈਚ ਵੀ ਚੁਣਿਆ ਗਿਆ। ਦੂਜੇ ਪਾਸੇ ਜੇਕਰ ਮੈਥਿਊ ਵੇਡ ਦੇ ਆਈਪੀਐਲ ਕਰੀਅਰ ਦੀ ਗੱਲ ਕਰੀਏ ਤਾਂ ਉਸ ਨੇ 3 ਆਈਪੀਐਲ ਮੈਚਾਂ ਵਿੱਚ 7.33 ਦੀ ਮਾਮੂਲੀ ਔਸਤ ਨਾਲ ਸਿਰਫ਼ 22 ਦੌੜਾਂ ਬਣਾਈਆਂ ਹਨ।