ਸ਼ੁਭਮਨ ਗਿੱਲ ਆਈਪੀਐਲ 2021 ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇਕੇਆਰ) ਦੀ ਟੀਮ ਦਾ ਹਿੱਸਾ ਸੀ ਅਤੇ ਓਪਨਿੰਗ ਦੌਰਾਨ ਉਸ ਦੀ ਸਟ੍ਰਾਈਕ ਰੇਟ ਅਕਸਰ ਸਵਾਲਾਂ ਦੇ ਘੇਰੇ ਵਿੱਚ ਰਹਿੰਦੀ ਸੀ। ਹਾਲਾਂਕਿ ਆਉਣ ਵਾਲੇ ਸੀਜ਼ਨ 'ਚ ਸ਼ੁਭਮਨ ਗਿੱਲ ਗੁਜਰਾਤ ਟਾਈਟਨਸ ਲਈ ਖੇਡਦੇ ਨਜ਼ਰ ਆਉਣਗੇ ਅਤੇ ਇਸ ਦੌਰਾਨ ਉਨ੍ਹਾਂ ਨੇ ਪਿਛਲੇ ਸੀਜ਼ਨ 'ਚ ਆਪਣੀ ਧੀਮੀ ਬੱਲੇਬਾਜ਼ੀ ਨੂੰ ਲੈ ਕੇ ਵੀ ਚੁੱਪੀ ਤੋੜੀ ਹੈ।
ਪੰਜਾਬ ਦੇ ਰਹਿਣ ਵਾਲੇ ਸ਼ੁਭਮਨ ਨੂੰ ਭਾਰਤੀ ਟੀਮ ਦਾ ਭਵਿੱਖ ਮੰਨਿਆ ਜਾ ਰਿਹਾ ਹੈ ਅਤੇ ਇਹੀ ਕਾਰਨ ਹੈ ਕਿ ਉਸ ਨੂੰ ਸਭ ਤੋਂ ਪਹਿਲਾਂ ਗੁਜਰਾਤ ਟੀਮ ਨੇ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ ਸੀ। ਹਾਲਾਂਕਿ, ਆਈਪੀਐਲ ਵਿੱਚ ਬਾਕੀ ਬੱਲੇਬਾਜ਼ਾਂ ਦੇ ਉਲਟ, ਉਸਦਾ ਸਟ੍ਰਾਈਕ ਰੇਟ ਸਿਰਫ 123 ਹੈ। ਅਜਿਹੇ 'ਚ ਉਸ ਦਾ ਆਈਪੀਐੱਲ ਸਟ੍ਰਾਈਕ ਰੇਟ ਵੀ ਗੁਜਰਾਤ ਲਈ ਕੁਝ ਹੱਦ ਤੱਕ ਚਿੰਤਾਜਨਕ ਹੈ।
ESPNcricinfo ਨਾਲ ਗੱਲਬਾਤ ਦੌਰਾਨ, ਉਸਨੇ ਕਿਹਾ, “ਇਹ ਹਰ ਸਥਿਤੀ ਵਿੱਚ ਵੱਖਰਾ ਹੁੰਦਾ ਹੈ ਅਤੇ ਜਦੋਂ ਤੁਸੀਂ ਬੱਲੇਬਾਜ਼ੀ ਕਰਨ ਜਾਂਦੇ ਹੋ ਤਾਂ ਵੱਖ-ਵੱਖ ਟਾਰਗੇਟ ਹੁੰਦੇ ਹਨ। ਤੁਹਾਡੀ ਮਾਨਸਿਕਤਾ ਹਰ ਪਾਰੀ ਵਿੱਚ ਇੱਕੋ ਜਿਹੀ ਨਹੀਂ ਹੋ ਸਕਦੀ। ਵਿਕਟ ਵੱਖਰਾ ਹੋ ਸਕਦਾ ਹੈ। ਇਸ ਲਈ ਤੁਹਾਨੂੰ ਉਸ ਅਨੁਸਾਰ ਯੋਜਨਾ ਬਣਾਉਣੀ ਪਵੇਗੀ। ਇਹ ਇੱਕ ਖਿਡਾਰੀ ਦੇ ਤੌਰ 'ਤੇ ਚੁਣੌਤੀ ਹੈ ਅਤੇ ਤੁਸੀਂ ਜਾਣਦੇ ਹੋ ਕਿ ਜੇਕਰ ਤੁਸੀਂ ਉਸੇ ਮਾਨਸਿਕਤਾ ਅਤੇ ਖੇਡ ਯੋਜਨਾ ਨਾਲ ਖੇਡਦੇ ਹੋ, ਤਾਂ ਵਿਰੋਧੀ ਲਈ ਰਣਨੀਤੀ ਬਣਾਉਣਾ ਬਹੁਤ ਆਸਾਨ ਹੋ ਜਾਂਦਾ ਹੈ।"
