ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਸ਼ੁੱਕਰਵਾਰ ਨੂੰ ਐਲਾਨ ਕੀਤਾ ਕਿ ਸਾਰੀਆਂ 10 ਟੀਮਾਂ IPL 2022 ਵਿੱਚ 14 ਲੀਗ ਮੈਚ ਖੇਡਣਗੀਆਂ। ਜਿਸ ਵਿੱਚ ਹਰੇਕ ਟੀਮ ਪੰਜ ਟੀਮਾਂ ਖਿਲਾਫ ਦੋ ਮੈਚ ਅਤੇ ਚਾਰ ਟੀਮਾਂ ਖਿਲਾਫ ਇੱਕ ਮੈਚ ਖੇਡੇਗੀ। ਤੁਹਾਨੂੰ ਦੱਸ ਦੇਈਏ ਕਿ ਇਸ ਸੀਜ਼ਨ 'ਚ ਲੀਗ ਮੈਚਾਂ ਸਮੇਤ ਕੁੱਲ 74 ਮੈਚ ਖੇਡੇ ਜਾਣਗੇ।
10 ਟੀਮਾਂ ਨੂੰ ਦੋ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ। ਮੁੰਬਈ ਇੰਡੀਅਨਜ਼, ਕੋਲਕਾਤਾ ਨਾਈਟ ਰਾਈਡਰਜ਼, ਰਾਜਸਥਾਨ ਰਾਇਲਜ਼, ਦਿੱਲੀ ਕੈਪੀਟਲਜ਼ ਅਤੇ ਲਖਨਊ ਸੁਪਰ ਜਾਇੰਟਸ ਨੂੰ ਗਰੁੱਪ ਏ ਵਿੱਚ ਰੱਖਿਆ ਗਿਆ ਹੈ, ਜਦਕਿ ਚੇਨਈ ਸੁਪਰ ਕਿੰਗਜ਼, ਸਨਰਾਈਜ਼ਰਜ਼ ਹੈਦਰਾਬਾਦ, ਰਾਇਲ ਚੈਲੇਂਜਰਜ਼ ਬੈਂਗਲੁਰੂ, ਪੰਜਾਬ ਕਿੰਗਜ਼ ਅਤੇ ਗੁਜਰਾਤ ਟਾਈਟਨਸ ਗਰੁੱਪ ਬੀ ਵਿੱਚ ਹਨ।
ਇਸ ਤੋਂ ਪਹਿਲਾਂ 8 ਟੀਮਾਂ ਦਾ ਇਹ ਟੂਰਨਾਮੈਂਟ ਬਿਨਾਂ ਕਿਸੇ ਗਰੁੱਪ ਦੇ ਡਬਲ ਰਾਊਂਡ-ਰੋਬਿਨ ਫਾਰਮੈਟ ਵਿੱਚ ਖੇਡਿਆ ਜਾਂਦਾ ਸੀ। ਜਿਸ 'ਚ ਹਰ ਟੀਮ ਦੂਜੀਆਂ ਟੀਮਾਂ ਖਿਲਾਫ 2-2 ਮੈਚ ਖੇਡਦੀ ਸੀ ਪਰ ਇਸ ਸੀਜ਼ਨ 'ਚ ਦੋ ਨਵੀਆਂ ਟੀਮਾਂ ਦੇ ਆਉਣ ਨਾਲ ਫਾਰਮੈਟ ਬਦਲ ਗਿਆ ਹੈ। ਟੀਮਾਂ ਨੇ ਕਿੰਨੇ ਆਈਪੀਐਲ ਖ਼ਿਤਾਬ ਜਿੱਤੇ ਹਨ ਅਤੇ ਕਿੰਨੇ ਫਾਈਨਲ ਮੈਚ ਖੇਡੇ ਹਨ, ਬੀਸੀਸੀਆਈ ਨੇ ਉਸੇ ਤਰਜ਼ 'ਤੇ ਗਰੁੱਪ ਨੂੰ ਵੰਡਿਆ ਹੈ। ਪੰਜ ਵਾਰ ਆਈਪੀਐਲ ਟਰਾਫੀ ਜਿੱਤਣ ਵਾਲੀ ਮੁੰਬਈ ਪਹਿਲੇ ਸਥਾਨ 'ਤੇ ਹੈ ਜਦਕਿ ਚਾਰ ਵਾਰ ਦੀ ਚੈਂਪੀਅਨ ਚੇਨਈ ਦੂਜੇ ਸਥਾਨ 'ਤੇ ਹੈ।
