IPL 2020: ਮੁੰਬਈ ਇੰਡੀਅਨਜ਼ ਨੇ ਰਾਜਸਥਾਨ ਰਾਇਲਜ਼ ਨੂੰ 57 ਦੌੜਾਂ ਨਾਲ ਹਰਾਇਆ, 5 ਸਾਲਾਂ ਬਾਅਦ ਹਾਸਲ ਕੀਤੀ ਜਿੱਤ
ਮੁੰਬਈ ਇੰਡੀਅਨਜ਼ ਨੇ ਰਾਜਸਥਾਨ ਰਾਇਲਜ਼ ਨੂੰ ਮੰਗਲਵਾਰ ਨੂੰ ਅਬੂ ਧਾਬੀ ਦੇ ਸ਼ੇਖ ਜਾਇਦ ਸਟੇਡੀਅਮ ਮੈਚ ਵਿਚ 57 ਦੌੜਾਂ ਨਾਲ ਹਰਾ ਦਿੱਤਾ. ਸੂਰਯਕੁਮਾਰ ਯਾਦਵ ਦੀ ਸ਼ਾਨਦਾਰ ਬੱਲੇਬਾਜੀ ਅਤੇ ਜਸਪ੍ਰੀਤ ਬੁਮਰਾਹ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੇ ਚਲਦੇ ਮੁੰਬਈ ਇਹ ਕਾਰਨਾਮਾ ਕਰ ਸਕੀ....
ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਮੁੰਬਈ ਨੇ ਸੂਰਯਕੁਮਾਰ ਯਾਦਵ (ਨਾਬਾਦ 79, 47 ਗੇਂਦਾਂ, 11 ਚੌਕੇ, 2 ਛੱਕਿਆਂ) ਦੀ ਮਦਦ ਨਾਲ 20 ਓਵਰਾਂ ਵਿਚ ਚਾਰ ਵਿਕਟਾਂ ਗੁਆ ਕੇ 193 ਦੌੜਾਂ ਬਣਾਈਆਂ. ਟੀਚੇ ਦਾ ਪਿੱਛਾ ਕਰਦੇ ਹੋਏ ਰਾਜਸਥਾਨ ਦੀ ਟੀਮ 18.1 ਓਵਰਾਂ ਵਿਚ 136 ਦੌੜਾਂ 'ਤੇ ਆਲ ਆਉਟ ਹੋ ਗਈ.
Trending
ਰਾਜਸਥਾਨ ਲਈ ਜੋਸ ਬਟਲਰ (70 ਦੌੜਾਂ, 44 ਗੇਂਦਾਂ, 4 ਚੌਕੇ, 5 ਛੱਕੇ) ਨੇ ਇਕੱਲੇ ਲੜਾਈ ਲੜਨ ਦਾ ਜਜਬਾ ਦਿਖਾਇਆ, ਪਰ ਦੂਜੇ ਸਿਰੇ ਤੋਂ ਉਹਨਾਂ ਨੂੰ ਕਿਸੇ ਦਾ ਸਾਥ ਨਹੀਂ ਮਿਲੀਆ. ਮੁੰਬਈ ਦੀ ਇਸ ਜਿੱਤ ਦੇ ਨਾਇਕ ਜਸਪ੍ਰੀਤ ਬੁਮਰਾਹ ਵੀ ਸੀ ਜਿਹਨਾਂ ਨੇ ਚਾਰ ਓਵਰਾਂ ਵਿੱਚ 20 ਦੌੜਾਂ ਦੇ ਕੇ ਚਾਰ ਵਿਕਟਾਂ ਲਈਆਂ.
ਆਪਣਾ ਦੂਜਾ ਆਈਪੀਐਲ ਮੈਚ ਖੇਡਦੇ ਹੋਏ ਯਸ਼ਸਵੀ ਜੈਸਵਾਲ ਬਿਨਾਂ ਕੋਈ ਸਕੋਰ ਦੇ ਦੂਸਰੀ ਗੇਂਦ 'ਤੇ ਆਉਟ ਹੋ ਗਏ. ਉਹਨਾਂ ਦਾ ਵਿਕਟ ਟ੍ਰੇਂਟ ਬੋਲਟ ਨੇ ਲਿਆ. ਬੋਲਟ ਨੇ ਇਸ ਤੋਂ ਬਾਅਦ ਇਨ-ਫੌਰਮ ਬੱਲੇਬਾਜ਼ ਸੰਜੂ ਸੈਮਸਨ ਨੂੰ ਵੀ ਪਵੇਲਿਅਨ ਦੀ ਰਾਹ ਦਿਖਾਈ. ਸੈਮਸਨ ਖਾਤਾ ਵੀ ਨਹੀਂ ਖੋਲ੍ਹ ਸਕੇ.
ਕਪਤਾਨ ਸਟੀਵ ਸਮਿਥ (6) ਨੂੰ ਬੁਮਰਾਹ ਨੇ ਸੈਮਸਨ ਤੋਂ ਪਹਿਲਾਂ ਆਉਟ ਕੀਤਾ. ਇੱਥੋਂ, ਰਾਜਸਥਾਨ ਨੂੰ ਜਿਤਾਉਣ ਦੀ ਜ਼ਿੰਮੇਵਾਰੀ ਪੂਰੀ ਤਰ੍ਹਾਂ ਜੋਸ ਬਟਲਰ 'ਤੇ ਆ ਗਈ. ਰਾਜਸਥਾਨ ਦਾ ਸਕੋਰ 10 ਓਵਰਾਂ ਦੇ ਬਾਅਦ 63/4 ਸੀ. ਰਾਜਸਥਾਨ ਨੂੰ 10 ਓਵਰਾਂ ਵਿਚ 131 ਦੌੜਾਂ ਦੀ ਲੋੜ ਸੀ.
ਬਟਲਰ ਨੂੰ ਆਪਣੇ ਦੇਸ਼ ਦੇ ਰਹਿਣ ਵਾਲੇ ਟੌਮ ਕਰੈਨ (15) ਦਾ ਥੋੜ੍ਹਾ ਸਾਥ ਮਿਲਿਆ. ਦੋਵੇਂ ਅੰਗਰੇਜ਼ੀ ਖਿਡਾਰੀਆਂ ਨੇ ਕੋਸ਼ਿਸ਼ ਕੀਤੀ. ਪਰ ਪੋਲਾਰਡ ਨੇ ਬਟਲਰ ਦਾ ਸ਼ਾਨਦਾਰ ਕੈਚ ਫੜਕੇ ਰਾਜਸਥਾਨ ਦੀ ਬਚਿਆਂ ਹੋਈਆਂ ਉਮੀਦਾਂ ਨੂੰ ਵੀ ਖਤਮ ਕਰ ਦਿੱਤਾ.
ਅੰਤ ਵਿੱਚ ਜੋਫਰਾ ਆਰਚਰ ਨੇ 11 ਗੇਂਦਾਂ ਵਿੱਚ ਤਿੰਨ ਚੌਕਿਆਂ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 24 ਦੌੜਾਂ ਬਣਾਈਆਂ ਪਰ ਉਹ ਟੀਮ ਦੀ ਹਾਰ ਨਹੀਂ ਟਾਲ ਸਕੇ.
ਇਸ ਤੋਂ ਪਹਿਲਾਂ, ਹੁਣ ਤੱਕ ਮੁੰਬਈ ਲਈ ਵੱਡੀ ਪਾਰੀ ਖੇਡਣ ਵਿਚ ਅਸਫਲ ਰਹਿਣ ਵਾਲੇ ਸੂਰਯਕੁਮਾਰ ਯਾਦਵ ਨੇ ਇਸ ਮੁਕਾਬਲੇ ਵਿਚ ਜਬਰਦਸਤ ਪ੍ਰਦਰਸ਼ਨ ਕੀਤਾ. ਉਹਨਾਂ ਨੇ ਇਸ ਮੈਚ ਵਿਚ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕੀਤਾ ਅਤੇ ਤਜ਼ਰਬੇ ਦੀ ਵਰਤੋਂ ਕਰਕੇ ਇਕ ਸਿਰੇ ਤੋਂ ਮੁੰਬਈ ਦੀ ਪਾਰੀ ਨੂੰ ਸੰਭਾਲੇ ਰੱਖਿਆ. ਹਾਰਦਿਕ ਪਾਂਡਿਆ ਨੇ ਵੀ ਯਾਦਵ ਦਾ ਸਾਥ ਦਿੱਤਾ. ਪਾਂਡਿਆ ਨੇ (30 ਦੌੜਾਂ, 19 ਗੇਂਦਾਂ, 2 ਚੌਕੇ, 1 ਛੱਕਾ) ਸੂਰਯਕੁਮਾਰ ਨਾਲ 76 ਦੌੜਾਂ ਜੋੜੀਆਂ.
ਮੁੰਬਈ ਦੀ ਓਪਨਿੰਗ ਜੋੜੀ ਕੁਇੰਟਨ ਡੀ ਕਾੱਕ (23) ਅਤੇ ਰੋਹਿਤ ਸ਼ਰਮਾ (35) ਨੇ ਮੁੰਬਈ ਨੂੰ ਮਜ਼ਬੂਤ ਸ਼ੁਰੂਆਤ ਦਿੱਤੀ ਅਤੇ 49 ਦੌੜਾਂ ਜੋੜੀਆਂ. ਅੰਡਰ -19 ਟੀਮ ਦੇ ਸਟਾਰ ਗੇਂਦਬਾਜ਼ ਕਾਰਤਿਕ ਤਿਆਗੀ ਨੇ ਇਸ ਮੈਚ ਤੋਂ ਆਈਪੀਐਲ ਦੀ ਸ਼ੁਰੂਆਤ ਕਰਦਿਆਂ ਡੀ ਕਾੱਕ ਨੂੰ ਆਉਟ ਕੀਤਾ.
ਇਸ ਤੋਂ ਬਾਅਦ ਰੋਹਿਤ 35 ਦੌੜਾਂ ਬਣਾ ਕੇ ਲੈੱਗ ਸਪਿਨਰ ਸ਼੍ਰੇਅਸ ਗੋਪਾਲ ਦੀ ਗੇਂਦ ਤੇ ਆਉਟ ਹੋ ਗਏ. ਇਨ-ਫੌਰਮ ਬੱਲੇਬਾਜ਼ ਈਸ਼ਾਨ ਕਿਸ਼ਨ ਇਸ ਮੈਚ ਵਿਚ ਖਾਤਾ ਵੀ ਨਹੀਂ ਖੋਲ੍ਹ ਸਕੇ. ਰੋਹਿਤ ਦੇ ਬਾਅਦ ਅਗਲੀ ਗੇਂਦ 'ਤੇ ਈਸ਼ਾਨ ਨੂੰ ਗੋਪਾਲ ਨੇ ਆਉਟ ਕੀਤਾ.
ਇਸ ਤੋਂ ਬਾਅਦ ਸੂਰਯਕੁਮਾਰ ਅਤੇ ਹਾਰਦਿਕ ਨੇ ਦੋਵੇਂ ਸਿਰੇ ਤੋਂ ਤੇਜ ਦੌੜਾਂ ਬਣਾਉਣੀਆਂ ਸ਼ੁਰੂ ਕਰ ਦਿੱਤੀਆਂ. ਸੂਰਯਕੁਮਾਰ ਨੇ ਮੈਦਾਨ ਦੇ ਚਾਰੇ ਪਾਸੇ ਸ਼ਾਟ ਲਗਾਏ. ਇਸ ਦੌਰਾਨ ਟੌਮ ਕਰੈਨ ਨੇ ਹਾਰਦਿਕ ਦਾ ਕੈਚ ਆਪਣੀ ਹੀ ਗੇਂਦ ਉੱਤੇ ਛੱਡ ਦਿੱਤਾ, ਜਿਸਦਾ ਪਾਂਡਿਆ ਨੇ ਪੂਰਾ ਫਾਇਦਾ ਉਠਾਇਆ.
