உலகக்கோப்பை 2023: முதல் முறையாக கோப்பையை வென்று சாதனை படைக்குமா தென் ஆப்பிரிக்கா?

இதுவரை ஒருமுறை கூட ஐசிசியின் உலகக்கோப்பையை வெல்லாமல் தவித்துவரும் தென் ஆப்பிரிக்க அணி, இம்முறையாவது கோப்பையை வென்று சாதிக்குமா என்ற எதிர்பார்ப்பு அதிகரித்துள்ளது.

உலகக்கோப்பை 2023: முதல் முறையாக கோப்பையை வென்று சாதனை படைக்குமா தென் ஆப்பிரிக்கா? (Image Source: Google)

ஐசிசி 2023 உலகக் கோப்பை தொடரை சொந்த மண்ணில் இந்திய அணி வெல்லும் என்று எதிர்பார்க்கப்பட்டாலும் அதற்கு நடப்பு சாம்பியன் இங்கிலாந்து, ஆஸ்திரேலியா போன்ற அணிகள் சவாலை கொடுக்கும் என நம்பப்படுகிறது. அந்த வரிசையில் இந்தியா மட்டுமின்றி உலகின் அனைத்து கிரிக்கெட் அணிகளுக்கும் சவாலை கொடுக்கும் ஒரு அணியாக தென்னாப்பிரிக்கா திகழ்கிறது என்றே சொல்லலாம்.

இந்நிலையில், ஜக் காலிஸ், எபி டி வில்லியர்ஸ், டேல் ஸ்டெய்ன் போன்ற கிரிக்கெட் வரலாற்றின் தலைசிறந்த பல வீரர்கள் தென் ஆப்ரிக்கா அணியில் இருந்து கிரிக்கெட் உலகிற்கு கிடைத்திருந்தாலும், தென் ஆப்ரிக்கா அணியால் இதுவரை ஒரு முறை கூட உலகக்கோப்பையை வெல்ல முடியவில்லை. பேட்டிங், பந்துவீச்சு என அனைத்திலும் தென் ஆப்ரிக்கா அணி வலுவான அணியாக இருந்தாலும், உலகக்கோப்பை போன்ற பெரிய தொடர்களில் சொதப்பி கோப்பையை வெல்லும் வாய்ப்பை தொடர்ந்து இழந்து வருவதால் அந்த அணியை ரசிகர்கள் “சோக்கர்ஸ்” என கிண்டல் செய்வது வழக்கம். 

எடுத்துக்காட்டாக 1992 உலகக் கோப்பையில் முக்கிய போட்டியில் மழை வந்து 1 பந்துக்கு 22 ரன்கள் எடுக்க வேண்டும் என்ற அதிர்ஷ்டமற்ற நிலையால் தென் ஆப்பிரிக்கா வெற்றியைக் கோட்டை விட்டது. அதே போல 1999 உலகக்கோப்பை அரையிறுதிப்போட்டியில் ஸ்டீவ் வாக் கேட்ச்சை ஹெர்சல் கிப்ஸ் விட்டதும், ஆலன் டொனால்ட் சரியாக சிங்கிள் எடுக்காமல் வீணடித்ததும் எதிரணிக்கு தாரை வார்த்தது. இப்படி ஓவ்வொரு முறையும் அதிர்ஷ்டமில்லாமல் கோப்பையை தவறவிட்டுள்ள தென் ஆப்பிரிக்க அணி இம்முறையாவது கோப்பையை கைகளில் ஏந்துமா என்ற எதிர்பார்ப்பு அதிகரித்துள்ளது.

தென் ஆப்பிரிக்க அணியின் பலம் மற்றும் பலவீனம்

டெம்பா பவுமா தலைமையில் களமிறங்கும் தென் ஆப்பிரிக்க அணியில் எதிரணிகளை மிரட்டும் அளவுக்கு காகிஸோ ரபாடா, லுங்கி இங்கிடி, மார்கோ யான்சென், ஜெரால்டு கோட்ஸி ஆகிய அனுபவமும் இளமையும் கலந்த வீரர்களால் வேகப்பந்து வீச்சு கூட்டணி வலுவாகவே இருக்கிறது. அதே போல தப்ரைஸ் ஷம்சி, கேசவ் மகாராஜ் ஆகிய முதன்மை ஸ்பின்னர்கள் எதிரணி பேட்ஸ்மேன்களுக்கு சவாலை கொடுக்கும் அளவுக்கு திறமையானவர்களாக கருதப்படுகின்றனர்

மறுபுறம் பேட்டிங் துறையை பார்க்கும் போது குயிண்டன் டீ காக், ஹென்றிச் கிளாசென், ரீசா ஹென்றிக்ஸ், ஐடன் மார்க்ரம் ஆகியோர் வலுப்படுத்தும் நிலையில் ஃபினிஷராக டேவிட் மில்லர் எதிரணிகளைப் பந்தாட தயாராக இருக்கிறார். அதில் கிளாசென் சமீபத்திய ஆஸ்திரேலிய தொடரில் அபாரமாக விளையாடி நல்ல ஃபார்மில் இருக்கும் நிலையில் மார்க்ரம் தேவைப்படும் போது சுழல் பந்துகளை வீசுவார் என்பது அந்த அணிக்கு பலமாக பார்க்கப்படுகிறது.

அதே சமயம் கேப்டன் டெம்பா பவுமா தொடர்ந்து பெரிய ரன்களை குவிப்பதில் தடுமாற கூடியவராக இருந்த நிலையில் சமீபத்தில் நடைபெற்ற ஒருநாள் போட்டிகளில் பெரிய ஸ்கோரை குவித்து வருகிறார். இது அணிக்கு மிகப்பெரும் பலமாக பார்க்கப்படுகிறது. அதேசமயம் ஹர்திக் பாண்டியா, மிட்சேல் மார்ஷ் போல வேகப்பந்து வீச்சு ஆல் ரவுண்டராக சேர்க்கப்பட்டுள்ள ஆண்டிலோ பெஹ்லுக்வியோ ஃபார்மிலும் இல்லாதது அந்த அணியில் உள்ள முக்கிய குறையாக பார்க்கப்படுகிறது. 

இருப்பினும் மில்லர், டீ காக், ரபாடா போன்ற பெரும்பாலான தென்னாப்பிரிக்க வீரர்கள் ஐபிஎல் தொடரில் விளையாடி இந்திய சூழ்நிலைகளை நன்கு இருந்திருப்பது மறைமுகமான சாதகமாகும். மொத்தத்தில் சில குறைகள் இருந்தாலும் அதிர்ஷ்டத்தின் உதவி இருக்கும் பட்சத்தில் அதை நிறையாக்கி தங்களுடைய லட்சிய கனவு உலக கோப்பையை இந்திய மண்ணில் முத்தமிடுவதற்கான தரமும் தகுதியும் தென் ஆப்பிரிக்க அணியில் இருக்கிறது.

உலகக்கோப்பை தொடரில் தென் ஆப்பிரிக்கா

•      1975: சர்வதேச கிரிக்கெட்டில் இருந்து தடை செய்யப்பட்டது
•      1979: சர்வதேச கிரிக்கெட்டில் இருந்து தடை செய்யப்பட்டது
•      1983: சர்வதேச கிரிக்கெட்டில் இருந்து தடை செய்யப்பட்டது
•      1987: சர்வதேச கிரிக்கெட்டில் இருந்து தடை செய்யப்பட்டது
•      1992: அரையிறுதி சுற்று
•      1996: காலிறுதி சுற்று
•      1999: அரையிறுதி சுற்று
•      2003: லீக் சுற்று
•      2007: அரையிறுதி சுற்று
•      2011: காலிறுதி சுற்று
•      2015: அரையிறுதி சுற்று
•      2019: லீக் சுற்று

உலகக்கோப்பை தொடருக்கான தென் ஆப்பிரிக்கா அணி 

டெம்பா பவுமா (கேப்டன்), ஜெரால்ட் கோட்ஸி, குயின்டன் டி காக், ரீசா ஹென்ட்ரிக்ஸ், மார்கோ ஜான்சன், ஹென்ரிச் கிளாசென், கேசவ் மகாராஜ், ஐடன் மார்க்ரம், டேவிட் மில்லர், லுங்கி இங்கிடி, ஆண்டிலே பெஹ்லுக்வாயோ, ககிசோ ரபாடா, தப்ரைஸ் ஷம்சி, ரஸ்ஸி வான் டெர் டுசென், லிசாட் வில்லியம்ஸ்.

தென் ஆப்பிரிக்க அணியின் போட்டி அட்டவணை (GMT)

•      அக்டோபர் 07: இலங்கை, டெல்லி(0830)
•      அக்டோபர் 12: ஆஸ்திரேலியா, லக்னோ (0830)
•      அக்டோபர் 17: நெதர்லாந்து, தர்மசாலா(0830)
•      அக்டோபர் 21: இங்கிலாந்து, மும்பை (0830)
•      அக்டோபர் 24: வங்கதேசம், மும்பை (0830)
•      அக்டோபர் 27: பாகிஸ்தானுக்கு, சென்னை (0830)
•      நவம்பர் 01: நியூசிலாந்து, புனே (0830)
•      நவம்பர் 05: இந்தியா, கொல்கத்தா (0830)
•      நவம்பர் 10: ஆஃப்கானிஸ்தான், அஹ்மதாபாத்(0830)