ICC ਮਹਿਲਾ ਵਿਸ਼ਵ ਕੱਪ 2022: ਦੱਖਣੀ ਅਫਰੀਕਾ ਨੂੰ 137 ਦੌੜਾਂ ਨਾਲ ਹਰਾ ਕੇ ਫਾਈਨਲ 'ਚ ਪਹੁੰਚੀਆਂ ਇੰਗਲੈਂਡ
ICC Women’s World Cup 2022 england beat south africa to reach finals : ਦੱਖਣੀ ਅਫਰੀਕਾ ਨੂੰ 137 ਦੌੜਾਂ ਨਾਲ ਹਰਾ ਕੇ ਇੰਗਲੈਂਡ ਦੀ ਟੀਮ ਫਾਈਨਲ 'ਚ ਪਹੁੰਚ ਗਈ ਹੈ ਜਿੱਥੇ, ਉਹਨਾਂ ਦਾ ਸਾਹਮਣਾ ਆਸਟ੍ਰੇਲੀਆ ਨਾਲ ਹੋਵੇਗਾ।
ਆਈਸੀਸੀ ਮਹਿਲਾ ਵਿਸ਼ਵ ਕੱਪ 2022: ਸਲਾਮੀ ਬੱਲੇਬਾਜ਼ ਡੈਨੀ ਵਿਆਟ (129) ਅਤੇ ਸਪਿਨਰ ਸੋਫੀ ਏਕਲਸਟੋਨ (6/36) ਦੇ ਸ਼ਾਨਦਾਰ ਪ੍ਰਦਰਸ਼ਨ ਬਦੌਲਤ ਇੰਗਲੈਂਡ ਦੀ ਟੀਮ ਨੇ ਦੱਖਣੀ ਅਫਰੀਕਾ ਨੂੰ 137 ਦੌੜਾਂ ਨਾਲ ਹਰਾ ਕੇ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ। ਇੰਗਲੈਂਡ ਨੇ ਆਪਣੇ ਖ਼ਿਤਾਬ ਬਚਾਓ ਦੀ ਸ਼ੁਰੂਆਤ ਤਿੰਨ ਹਾਰਾਂ ਨਾਲ ਕੀਤੀ ਪਰ ਅਗਲੇ ਪੰਜ ਮੈਚ ਜਿੱਤ ਕੇ ਫਾਈਨਲ ਚ ਐਂਟਰੀ ਕਰ ਲਈ।
ਇਸ ਦਬਾਅ ਵਾਲੇ ਨਾਕਆਊਟ ਮੈਚ ਵਿੱਚ 294 ਦੌੜਾਂ ਦੇ ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਨ ਉਤਰੀ ਦੱਖਣੀ ਅਫਰੀਕਾ ਕਦੇ ਵੀ ਟੀਚੇ ਦਾ ਪਿੱਛਾ ਨਹੀਂ ਕਰ ਸਕੀ। ਤੇਜ਼ ਗੇਂਦਬਾਜ਼ ਅਨਿਆ ਸ਼੍ਰੂਬਸੋਲ ਨੇ ਆਪਣੇ ਪਹਿਲੇ ਦੋ ਓਵਰਾਂ ਵਿੱਚ ਦੋਨਾਂ ਸਲਾਮੀ ਬੱਲੇਬਾਜ਼ਾਂ ਲੌਰਾ ਵੋਲਵਰਟ ਅਤੇ ਲੀਜ਼ਲ ਲੀ ਨੂੰ ਸਸਤੇ ਵਿੱਚ ਆਊਟ ਕੀਤਾ।
Trending
ਲਾਰਾ ਗੁਡਾਲ ਅਤੇ ਕਪਤਾਨ ਸਨ ਲੂਸ ਨੇ ਦੱਖਣੀ ਅਫਰੀਕਾ ਨੂੰ ਪਟੜੀ 'ਤੇ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਕੀਤੀ, ਪਰ ਇੰਗਲੈਂਡ ਨੇ ਜਵਾਬੀ ਕਾਰਵਾਈ ਕੀਤੀ ਕਿਉਂਕਿ ਕੇਟ ਕਰਾਸ ਨੇ ਲੂਸ ਨੂੰ ਕਲੀਨ ਬੋਲਡ ਕਰ ਦਿੱਤਾ ਜਦੋਂ ਕਿ ਗੁਡਾਲ ਨੇ ਚਾਰਲੀ ਡੀਨ ਦੇ ਖਿਲਾਫ ਸਕੂਪ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਗੇਂਦ ਸਟੰਪ 'ਤੇ ਲੱਗ ਗਈ। ਏਕਲਸਟਨ ਨੇ ਛੇ ਵਿਕਟਾਂ 'ਤੇ 36 ਦੌੜਾਂ ਦੇ ਕੇ ਦੱਖਣੀ ਅਫਰੀਕਾ ਨੂੰ 38 ਓਵਰਾਂ ਵਿਚ 156 ਦੌੜਾਂ 'ਤੇ ਆਲ ਆਊਟ ਕਰ ਦਿੱਤਾ।
ਇਸ ਤੋਂ ਪਹਿਲਾਂ ਇੰਗਲੈਂਡ ਲਈ ਡੇਨੀ ਵਿਆਟ ਨੇ 125 ਗੇਂਦਾਂ 'ਚ 129 ਦੌੜਾਂ, ਸੋਫੀਆ ਡੰਕਲੇ ਨੇ 72 ਗੇਂਦਾਂ 'ਚ 60 ਦੌੜਾਂ ਦੀ ਪਾਰੀ ਖੇਡ ਕੇ ਇੰਗਲੈਂਡ ਦਾ ਸਕੋਰ 50 ਓਵਰਾਂ 'ਚ 8 ਵਿਕਟਾਂ ਦੇ ਨੁਕਸਾਨ 'ਤੇ 293 ਦੌੜਾਂ 'ਤੇ ਪਹੁੰਚਾਇਆ। ਇਸ ਦੇ ਨਾਲ ਹੀ ਉਸ ਦੇ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਸ਼ਬਨੀਮ ਇਸਮਾਈਲ (3/46) ਅਤੇ ਮਾਰਿਜਨ ਕੈਪ (2/52) ਨੇ ਦੱਖਣੀ ਅਫਰੀਕਾ ਲਈ ਚੰਗੀ ਗੇਂਦਬਾਜ਼ੀ ਕੀਤੀ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਫਾਈਨਲ ਵਿਚ ਬਾਜ਼ੀ ਕਿਹੜੀ ਟੀਮ ਮਾਰੇਗੀ। ਹਾਲਾੰਕਿ, ਆਸਟ੍ਰੇਲੀਆ ਨੂੰ ਫਾਈਨਲ ਵਿਚ ਟੱਕਰ ਦੇਣਾ ਇੰਗਲਿਸ਼ ਟੀਮ ਲਈ ਬਿਲਕੁੱਲ ਵੀ ਆਸਾਨ ਨਹੀਂ ਰਹਿਣ ਵਾਲਾ ਹੈ।
