ਬ੍ਰਿਸਬੇਨ ਟੈਸਟ: ਲਾਬੂਸ਼ੇਨ ਦੇ ਸੈਂਕੜੇ ਦੀ ਬਦੌਲਤ ਆਸਟਰੇਲੀਆ ਚੰਗੀ ਸਥਿਤੀ ਵਿਚ ਪਹੁੰਚਿਆ, ਪਰ ਭਾਰਤ ਦੇ ਨਵੇਂ ਗੇਂਦਬਾਜ਼ਾਂ ਨੇ ਜਿੱਤਿਆ ਦਿਲ
ਆਸਟਰੇਲੀਆ ਨੇ ਗਾਬਾ ਅੰਤਰਰਾਸ਼ਟਰੀ ਸਟੇਡੀਅਮ ਵਿੱਚ ਭਾਰਤ ਖ਼ਿਲਾਫ਼ ਚੌਥੇ ਅਤੇ ਆਖਰੀ ਟੈਸਟ ਮੈਚ ਦੇ ਪਹਿਲੇ ਦਿਨ ਪੰਜ ਵਿਕਟਾਂ ਦੇ ਨੁਕਸਾਨ ’ਤੇ 274 ਦੌੜਾਂ ਬਣਾਈਆੰ। ਸਟੰਪਸ ਤੇ ਕਪਤਾਨ ਟਿਮ ਪੇਨ 38 ਅਤੇ ਕੈਮਰੁਨ ਗ੍ਰੀਨ 28 ਦੌੜਾਂ ਬਣਾ ਕੇ ਖੇਡ ਰਹੇ ਹਨ।
ਸੱਟਾਂ ਨਾਲ ਜ਼ਖਮੀ, ਭਾਰਤੀ ਟੀਮ ਚਾਰ ਤਬਦੀਲੀਆਂ ਨਾਲ ਮੈਚ ਖੇਡ ਰਹੀ ਹੈ। ਮਹਿਮਾਨ ਟੀਮ ਦੇ ਗੇਂਦਬਾਜ਼ ਅਨੁਭਵਹੀਨ ਅਤੇ ਨਵੇਂ ਹਨ ਪਰ ਫਿਰ ਵੀ ਭਾਰਤ ਦੇ ਨੌਜਵਾਨ ਗੇਂਦਬਾਜ਼ਾਂ ਨੇ ਆਸਟਰੇਲੀਆਈ ਬੱਲੇਬਾਜ਼ਾਂ ਦੇ ਸਾਹਮਣੇ ਚੰਗਾ ਪ੍ਰਦਰਸ਼ਨ ਕੀਤਾ।
Trending
ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਆਸਟਰੇਲੀਆ ਨੇ ਆਪਣੀ ਸ਼ੁਰੂਆਤੀ ਜੋੜੀ ਜਲਦੀ ਗੁਆ ਦਿੱਤੀ। ਹਾਲਾਂਕਿ, ਮਾਰਨਸ ਲਾਬੂਸ਼ੈਨ ਨੇ 108 ਦੌੜਾਂ ਦੀ ਪਾਰੀ ਖੇਡ ਕੇ ਆਸਟ੍ਰੇਲੀਆ ਨੂੰ ਮਜ਼ਬੂਤ ਕੀਤਾ, ਪਰ ਭਾਰਤ ਦੇ ਤੇਜ਼ ਗੇਂਦਬਾਜ਼ ਟੀ ਨਟਰਾਜਨ ਨੇ ਸ਼ਾਨਦਾਰ ਗੇਂਦਬਾਜੀ ਕਰਦਿਆਂ ਦੋ ਵਿਕਟਾਂ ਹਾਸਲ ਕਰਕੇ ਮੈਚ ਵਿਚ ਭਾਰਤ ਦੀ ਵਾਪਸੀ ਕਰਾਈ। ਹਾਲਾਂਕਿ, ਪੇਨ ਅਤੇ ਗ੍ਰੀਨ ਨੇ 61 ਦੌੜਾਂ ਦੀ ਸਾਂਝੇਦਾਰੀ ਕਰਦਿਆਂ ਇੱਕ ਵਾਰ ਫਿਰ ਆਸਟਰੇਲੀਆ ਨੂੰ ਮਜ਼ਬੂਤ ਸਥਿਤੀ ਵਿਚ ਪਹੁੰਚਾ ਦਿੱਤਾ।
ਦਿਨ ਦੇ ਪਹਿਲੇ ਹੀ ਓਵਰ ਵਿੱਚ ਮੁਹੰਮਦ ਸਿਰਾਜ ਨੇ ਡੇਵਿਡ ਵਾਰਨਰ (4) ਨੂੰ ਆਉਟ ਕਰਕੇ ਭਾਰਤ ਨੂੰ ਪਹਿਲੀ ਸਫਲਤਾ ਦਿਵਾਈ। ਸ਼ਾਰਦੂਲ ਠਾਕੁਰ ਨੇ ਮਾਰਕਸ ਹੈਰਿਸ (5) ਨੂੰ ਆਉਟ ਕਰਕੇ ਭਾਰਤ ਨੂੰ ਦੂਜੀ ਸਫਲਤਾ ਦਿੱਤੀ। ਆਸਟਰੇਲੀਆ ਨੇ ਆਪਣੇ ਦੋਵੇਂ ਸਲਾਮੀ ਬੱਲੇਬਾਜ਼ਾਂ ਨੂੰ ਕੁੱਲ ਸਕੋਰ 17 'ਤੇ ਗੁਆ ਦਿੱਤਾ ਸੀ।
